Dawa tohkit u MP Rajya Sabha ia ki jingkynnoh trei bym hok ha MPSC, yn iehnoh kam lada donkti ka kurim

Syllad | The Rising MeghalayaSeptember 27, 2024

U MP ba marwei ka Rajya Sabha u Dr WR Kharlukhi ha ka 26 tarik Nailur u la dawa da ka jingtohkit ba laitluid halor ki jingkynnoh treikam bym hok hapoh ka Meghalaya Public Service Commission (MPSC) da kaba ong ruh ba u long uba kloi ban iehnoh ia ka kam MP lada lap ba ka kurim jong u ka donkti lang.

Ha ka shithi sha u Myntri Rangbah ka Jylla u Conrad K Sangma, u Bah Kharlukhi u la ong, “Nga kwah ban pyntip sha phi ba dang shen ka la mih lyngba ki lad pathai khubor halor ki jingtreikam ki bym hok hapoh MPSC. I Kong Corina Lyngdoh iba dei iwei na ki dkhot jong ka Commission i dei i kurim jong nga, bad nga sngew ba kane ka la pynthohbria ia ka iing ka sem jong nga. Kumta khnang ban shai nga kyrpad ia ka sorkar ba kan thung da ka jingtohkit kaba laitluid halor kane ka kam.”

Nalor kata u la kyrpad ruh na ka bynta ban pyndep noh kloi ia kane ka jingtohkit hapoh ka shi bnai.

U Bah Kharlukhi haba kren sha ki lad pathai khubor u la ong, “Nga bad I kurim ngi la iakren halor kane bad i la ong ba lada ki shem ba i la leh ia kaba bakla, i long lakloi ban leit sha phatok. Kumjuh lada ka kynhun tohkit ka lap ba i kurim jong nga i donkti, ha ka sngi kaba bud ngan iehnoh ia ka kam MP khnang ba kin tip ba nga dei u briew uba kumno.”

U la ong ba kane ka jingdawa tohkit ka jong u ka long ban pynthikna ba baroh kiei kiei ki dei ban long halor ki jingshisha ym tang ha ki jingiakren hamsaia.

“Ka don ka hukum jong ka Iingbishar Supreme Court ha kaba 87.5% ka dei ka written bad 12.5% ka dei ka personal bad ym tang kata, balei kane ka hukum ka mih? Ka mih namar ba don ki jingleh bym hok ha ka Assam Public Service Commission (APSC) bad hadien ka jingtohkit da ki katto katne ki tnad la shem ba ka don ka jingshisha bad haduh mynta u Chairman ka APSA u dang don hapdeng ka jingshah set phatok,” ong u Dr Kharlukhi.

“Kumta yn ym don satia ki Commission ha ka ri India ki ba nud ban iaid pyrshah ia kane ka rai jong ka Supreme Court,” u la ong da kaba kyntu ia ki lad pathai khubor ba ki dei ruh ban da tohkit bniah ha ka jaka ban shu pynmih ia ki khubor tang na ka jingkren jong ki briew.”

U la ong ruh ba ki briew ki la pynmih ia ki jingkynnoh bamsap ha kaba bunsien ki jingkynnoh ka leit beit sha ka NPP. “Hynrei nga shem ba kane ka dei tang ka kam politics. Lada phi nud, wad ia ki jingshisha,” u la bynrap.

Shuh shuh une u MP u la kdew ruh ia ka jingjia ba dang shen kaba iadei bad ka jingkynnoh jong u nongialam ka Congress u Bah Vincent H Pala pyrshah ia u Symbud Myntri Rangbah ka Jylla u Sniawbhalang Dhar uba la ai da ka legal notice ba T.100 klur.

“Peit kaei kaba u Bah Pala u leh? U la kren shaphang u drok bad pynmih ia ka kyrteng jong u Symbud Myntri Rangbah. Kam lei lei lada u Bah Pala u bakla un sa duk da T.100 klur, hynrei lada ki jingkynnoh ki dei kiba shisha u Symbud Myntri Rangbah un hap shong phatok. Ka dei ban long ha kane ka rukom. Wat shu shim kyllum lang hajuh. Phi dei ban wad ia ki briew kiba donkti bad kdew beit ia ki,” u la ong shuh huh.