Dawa tohkit CBI kiba haiing ki shijur na Indore halor ka jingiap u Raja

Syllad | The Rising MeghalayaJune 3, 2025

Kiba haiing hasem jong ki shi kurim na Indore haka sngi Ar ki la dawa ban phah tohkit sha ka Central Bureau of Investigation (CBI) halor ka jingiap jong u Raja Raghuvanshi, hadien ba ia ka met ba la kem pyut jong u la lapdien na ka jaka riat ha kshaid Weisawdong hadien ba u la jah rngai bad la ka jong ka kurim ha ka thain Sohra naduh ka 23 tarik u bnai ba la dep. 

Haba kren sha ki lad pathai khubor ha NEIGRIHMS u Vipin uba dei u hymmen jong u Raja Raghuvanshi u la ong, “Ngi dawa jur ban pynlong ia ka jingtohkit da ka CBI halor kane ka jingjia.

“Kane ka long namar ba ki bor pulit ka jylla kim mynjur satia ba ka don ka jingleh kam bymman, hynrei lada kam don kaba kum kata te balei pat ba lap pynban ia ka metiap? Ia ka met jong u Raja la lap ha ka jingjngai kaba 25 kilomitar na ka jaka ba pynieng ia ka scooty kaba u shim wai. Kumta ngi suba jur ba ki la shah rahbor bad ialam shapoh kshaid Weisawdong,” u la ong haba ap ban pyndep ia ka jingleh post mortem hashwa ban pynkit noh ia ka met u para jong u sha Indore.

Nalor kata u Vipin u la ong ruh ba kam lah satia ban long ba u para jong u lem bad ka kurim jong u kin pynkut hi ia la ka jingrim namar ka jaka kaba la lap ia ka metiap jong u ka dei kaba don ia ka jingker kaba biang.

Watla katta u la ong ba na ka liang ki pulit kim mynjur satia ia kane ka jingkynnoh kiba haiing jong une u lanot ba ka dei ka kam rahbor, lute bad pyniap.

“Baroh arngut ki deng ia ki jingdeng ksiar. Artylli ki sati ksiar, u kynjri ksiar bad u jingdeng ksiar, ka bek pisa bad ka mobile ki la jah na ka met jong u Raja. Lada ka dei ka jingnoh iap hi, baroh kine ki mar kin ym jah satia,” ong une u hymmen.

Na ka liang kiba haiing kila ujor ia ka jingjah rngai jong kine ki shi kurim ha ka 23 tarik u Jymmang.

U Vipin u la kytu ruh ia ki bor sorkar ba kin pynthikna ban bteng ia ka jingwad bad ban wanlam im ia ka hepkynsi jong u ka Sonam Raghuvanshi.

Haba kylli, u la ong ba kam don satia kano kano ka jingiakynad ne ka jingiakynad hapdeng jong ki. “Ki dang shu pyndep ia ka jingiathoh shongkurim ha ka 11 tarik Jymmang bad ki don hapdeng ka jingkmen.”