Dawa thung doktor ka KSU bad FKJGP haki jaka sumar ha War Jaintia
Ka Khasi Students’ Union (KSU) bad ka Federation of Khasi Jaintia and Garo People (FKJGP) kila dawa naka tnad ka koit ka khiah ka jylla ban thung doktor bad ban pynbiang iaki jingdonkam ki lai tylli ki jaka sumar ha War Jaintia.
Kine ki ar seng kila dawa na u Director Health Services (MI) Dr Aman War ban thung doktor ha Jarain PHC, Pdengshakap PHC bad ha Nongtalang CHC. Nalor kata kila dawa ban pynioh ambulance ban kit nongpang ha kine ki jaka sumar.
Kane ka jingleit iakynduh ia u Director Health Services haka 29 tarik u Iaiong la iadonlang ki nongialam na ka KSU, u Laitphar Syngkrem, Lurman Talang, bad na ka FKJGP, u Reachingson Kongwang bad Bahshlur Mukhim.
La kyntu ruh iaka tnad ka koit ka khiah ban pyntreikam iaka jaka pynkha khyllung hapoh ka Jairain PHC bad ban maramot noh ia ka building Pdengshakap PHC.
La pynkynmaw ruh ia ka mat jingdawa ka kynhun joint action committee ban dawa kyntiew kyrdan ia ka Padu state dispensary.
U Dr Aman ula iathuh ba ka kam ka dang iaid shakhmat bad u la phah ruh ia kine ki seng ban iakynduh bad u DMHO ka West Jaintia Hills ban pyntip ia u ba un phah noh ia ki repot na ka bynta kane ka kam.
Na ka liang kine ki ar seng ki la pynpaw ka jingsngewkmen halor kane jingshimkhia une u ophisar bad kyrmen ba ka kam kan ur long noh shen ha kine ki khyndiat sngi na ka bynta ki pait ka thian war jaintia ha baroh kawei.
Facebook
Instagram
Youtube
Twitter
Leave a Reply