Dawa Sorkar ia ka NTA ban pynkynriah ia ka eksam CUET na ka bynta ki samla ba ngat thoh shabar ka Jylla

Syllad | The Rising MeghalayaMay 13, 2025

Ka Sorkar Jylla ka la dawa ia ka National Testing Agency (NTA) ba kan pynkynriah mardor ia ka eksam Common University Entrance Test (CUET-UG) na ka bynta ki samla pule ka Meghalaya kiba la shah pynngat ban ialeh ia ki eksam jong ki sha kiwei pat ki jylla.

Haba pyntip ia kane haka 12 tarik Jymmang u Myntri ka Tnad pule puthi u Rakkam A Sangma u la ong, “Ngi la thoh da ka shithi kaba tyngeh sha ka NTA ba ka dei ban pynkynriah mardor ia baroh ki eksam na ka bynta ki khynnah pule ka jylla kiba shah pynngat ban leit thoh ia ki eksam jong ki sha ki jaka kiba jngai na ka jylla.”

“Ngi la dep ruh ban bthah ia ka tnad pule puthi ba kan iakren sha kito ki khynnah kiba shah ktah,” u la bynrap.

U Rakkam u pyntip ruh ba ka NTA ka la iakren bad ka sorkar Jylla ban ithuh shuh shuh ia ki jaka thoh eksam khnang ba yn lah ban buh sa 200 tylli ki computer na ka bynta ban pynlong ia ka eksam CUET kaba iaid beit iaid ryntih. Kumta ruh ka kynhun na ka NTA kan pynlong ia ka jingjurip ia kitei ki jaka kiba la dep ithuh.

“Ngi la dep ban ithuh ia ki jingtei bad ngi la pyntip sha ka NTA bad kin wan lashai ka sngi ba Ar ban jurip bad khmih la kitei ki jaka ki la long ne em kiba biang katkum ki kyndon,” u la ong.

Nalor kata u Myntri u la kdew ruh ba ka sorkar jylla ka la ban jur halor ka jingdonkam ia ka NTA ba kan thung ia u Nodal Officer ba pura ha ka jylla.

“Ka NTA ka la dei ban pyntip sha ka sorkar jylla ha ka por kaba biang khnang ba ngin lah ban shim ia ki sienjam khnang ba ki khynnah kin ym iakynduh jingeh,” u la ong da kaba bynra, “Hynrei hadien ba la pyntip halor kane ka kam, kumta u Myntri Rangbah u la leit iakynduh ruh ia u Myntri ka sorkar pdeng bad ngi la don hapdeng jong ka kam ban pynbeit ia kane ka kam.”

Nalor kata u Rakkam u la ong ba ka jingeh ka la mih biang ha ka jylla Meghalaya hadien ka jingpulom jong ka NTA ban iakren bad ka sorkar jylla.

“Ki (NTA) ki la aijingtip tang hadien shi sngi bad ar sngi shwa ban pynlong ia ki eksam. Ka eksam kan sdang naduh lashai ka sngi bad katto katne na ki khynnah kiba dep mih ban leit sha ki jaka bapher bapher. Kumta ngin ym lah ban leh ei ei halor kata. Hynrei hadien ba u Myntri Rangbah ka jylla u la  iakren  bad u Myntri ka sorkar pdeng hynnin ka sngi ha Delhi, ka NTA ka la iakren bad ka sorkar jylla ban ithuh shuh shuh ia ki jaka thoh eksam bad mynta ngi la don ha ka kam,” u la ong.

Haba kylli, u Rakkam u la ong, “Nga thikna ba kito ki khynnah pule ki ban thoh ia ki eksam jong ki hadien jong kane ka taiew, khlem artatien ba ia kine ki eksam yn pynkynriah noh bad yn sa pynkynriah ruh ia ki jaka thoh eksam kumba la kualr da ka NTA. Na ka bynta kaba lashai ka sngi, katto katne ki samla pule ki lah dep mih ban leit thoh sha ki centre kiba don hajan. Hynrei, na ka bynta kito kiba hap ban leit thoh sha ki jaka kiba jngai kum sha Jharkhand kine ki eksam kin long ha ka 19 tarik Jymmang, bad na ka bynta kane nga tharai ngin lah ban pynbeit noh.

Halor ka daw sha lyndet ka jingbym lah ban pynbeit halor kane ka mat, u Rakkam u la ong, “Kane ka long namar kam dei satia ka rai jong ka sorkar jylla. Kumta ngi la dep thaw ia ka State University bad ki College kiba pyniasoh bad ka State University ki bym donkam shuh ban ialeh ia ka eksam CUET ban ioh jaka pule ne admission. Ka NTA ka hap ban pynlong bad ka dei ka rai ka jong ki, ngim lah ban leh ei ei halor kane.”

Katkum ka jingpynpaw ka jong u, ki sienjam kiba iadei bad ka jingpyniasoh ki college bad ka State University ka dei ka kam kaba la iaid shakhmat.

Kumjuh haba kylli ba ka pule puthi ka dei ka mat kaba hap hapoh ka jingkhmih ka sorkar jylla, bad hato u pyrkhat ba kane ka jingleh jong ka NTA ka long ka jingiuhroit ia ka sorkar jylla, u Myntri u la ong, “Kam shym long satia kumta, ka long kaba shai ba kito ki college kiba pyniasoh bad ki skulbah jong ka sorkar pdeng ki hap ban ialeh ia ka eksam CUET. Kumta ngin sa kyrpad ia ki jaka pule ba balei ngi hap ban mad ia kum kine ki jingeh man la ka por. Lada ki lah ban pyniasoh bad ka State University kan long kaba suk shibun.”