Dawa pynshitom ka TMC ia ka NPP ba pynkhein ia ka MCC shwa ka By-Election ha Gambegre

Syllad | The Rising MeghalayaOctober 17, 2024

Ka liang pyrshah All India Trinamool Congress (TMC) ha ka 16 tarik u Risaw ka la phah da ka jingujor pyrshah ia ka party synshar National People’s Party (NPP) halor ka jingkynnoh pynkhein ia ki kyndon jong ka Model Code of Conduct (MCC) da kaba sam ia ki tin sop iing sha ki nongshong shnong ha Gambegre constitunecy ka ban sa leit sha ka elekshon shiteng samoi (by-election) ha ka 13 tarik u Naiwieng 2024.

Ha ka shithi sha u Returning Officer, u District Co-ordinator ka AITC West Garo Hills u SN Sangma u la ong ba la pyntip sha u da ki nongtrei ka party ha kaba iadei bad ka jingpynkhein ia ka MCC da ki nongtrei jong ka party ka NPP kiba la sam ia ki tin sop iing sha ki nongshong shnong ha kylleng ki constituency ha ka jingpyrshang ban khring ia ki paidbah nongthep vote.

“Kane ka jingpyndonkam bakla ia ki jingdon jingem jong ka sorkar ym tang ba ka long kaba beain hynrei ka long ruh kum ka kam bamsap,” u la ong.

“Wat hadien ba ka Election Commission of India (ECI) ka la pynbna ia ka tarik ban pynlong ia ka jingiathep vote, hynrei ka NPP ka dang iai bteng ban leh ia kiba kum kine ki kam beain. Mynta ki la sam ia ki tiar ki tar hapoh ka shnong Aminda Simsang (polling station no 2), kata wat hadien ba ka MCC ka la dep treikam. Kane ka jingleh bym suitniew ia ki kyndon ba la buh ka pynduh mynsiem ia ka jingthmu ban pynlong ia ka elekshon kaba khuid bad kaba iaid beit iaid ryntih,” bynrap u Sangma.

Nalor kata une u nongialam ka TMC u la kynnoh ruh ba ka NPP ka la lum thup shibun bah ki tin sop iing hajan man la ki polling station, bad kane ka jingsam ka jong ki sha ki nongthep vote ka dang iai bteng khlem sangeh.

“Ha kaba iadei bad kane ka phang, Nga kyrpad ia ka jingtuklar lem ba mardor jong phi ban pynsangeh ia kiba kum kine ki jingleh bad ban pynthikna ba ka jingpynlong ia ka elekshon kan long kaba khuid ba suba bad ka bym shah liang,” ong u Sangma ha ka shithi.