Dawa pynshitom ka KHNAM ia u nongialam ka BJP ba ialam bakla shaphang ka Meghalaya

Syllad | The Rising MeghalayaJune 25, 2024

Ka Khun Hynniewtrep National Awakening Movement (KHNAM) ha ka 25 tarik Jylliew, ka la ujor da ka ejahar pyrshah ia u nongialam ka BJP halor ka jingialam bakla ha kaba iadei bad ka jinglong jingman hapoh ka jylla Meghalaya.

Ha kane ka ejahar ba la ujor sha u Officer in-charge Cyber Crime da u Working President ka KHNAM u Bah Thomas Passah la shim ruh ia ki jingkren jong une u nongialam ka BJP u Ashwini Updhyay uba la kynnoh ba ia ka Jylla Meghalaya la pyniaid da ki balang Khristan bad ki nongialam niam.

U la kynnoh ruh ba ki nongthaw ain bad ki bor sorkar kumjuh ka tnat pulit kim shym la treikam satia hapoh ka jylla Meghalaya, katba ki Sengbhalang ki dei tang ki kynhun lute bad ki lad pathai khubor ruh kim treikam satia ha kane ka jylla.

Nalor kata ula kam ba ki paid Hindu ki la nang phet namar ka jingshah khanglad ha kaba iadei bad ki jingleh niam ki jong ki ha kane ka jylla.

 “Kane ka jingkynnoh khlem nongrim jong une u nongialam ka BJP uba dei ruh u muktiar ha kane ka video kaba la saphriang lyngba ki social media ym tang ba ka ialam bakla hynrei ka lah ban buh jingma ruh ia ki nongshong shnong ka jylla kiba pule bad kiba shong ba sah ha kiwei pat ki bynta jong ka ri,” ong u nongialam ka KHNAM.

 “Kumta ngi la ujor da ka ejahar pyrshah ia une u briew khnang ba ki bor ba dei khmih kin shim ia ki lad jingpynshitom katkum ka ain,” bynrap u Bah Passah.