Dawa pynsangeh ïaka jingkhaii bar ri sha Bangladesh hadien bala pynbna containment areas

Syllad | The Rising MeghalayaApril 14, 2021

U Daniel Khongsit, Waheh Shnong Bakur haka sngi Balang ula dawa na ka bor pynïaid ka Amlarem Sub-Division ban pynsangeh shisyndon ïaka jingkhaii bar ri bad ka Bangladesh hadien bala pynbna containment areas ia ki 6 tylli ki shnong naduh Dawki, Bakur, Shongpdeng, Darrang, Lymba bad Kongwang namar ka jingur ka khlam COVID-19.

Ula kynnoh ba ka hukum kaba la pynmih u SDO (C) Amlarem kalong kaba theh shilliang bad kim hun satia ïa ka hukum namar baroh ki iew shnong, ki dukan dukdoh la phah khang lut, katba iaka jingkhaii bar ri pat la ailad ban kan iaid beit bad la pynhap iaka hapoh ka essential service ne kaba donkam na ka bynta u paidbah.

Ka Tamabil ruh ka hap hapoh ka Containment Areas, hynrei tang iaka khaii bar ri la pyllait, katba ki 6 shnong bad ki jaka rung na Dawki Amlarem Jowai road- Shnongpdeng, Dawki Boating Point bad Dawki PHC shaduh Tamabil la pynhap hapoh ka Containment Areas la khang sbak.

U Daniel ula dawa na ka bor shynshar district ban pynmih da kawei ka hukum da kaba long salonsar khlem da ktah iaka iap ka im u luk u lak.

U Sub-Divisional Officer (C) Amlarem Sub Division, Abhilash Baranwal, IAS haka sngi ba Ar ula pynbna containment areas iaka Shnongpdeng, Darrang, Kongwang, Lymba, Dawki, Bakur ban wad ia ki briew kiba don jingma na ka khlam Covid-19 bad ban tem iaka jingpur u khniang ha katei ka thain bad ka district. Nalor ki shnong la pynbna containment naduh na Entry Points ne jaka rung na Dawki Amlarem Jowai road- Shnongpdeng, Dawki Boating Point bad Dawki PHC shaduh Tamabil.

Katkum ka hukum, ka khaii pateng bar ri ka plie bad la bthah iaki kali ba kim bit ban sangeh shiteng lynti bad ki dei ban iaid beit sha kad khaii bad la bthah ia baroh ki nongkhaii kali bad ki nongkhaii ban bud ryngkhi iaki adong adit Covid-19. La pynhap ruh iaka Ophis Land Custom Station, Tamabil kum ka ophis ba donkam na ka bynta u paidbah.