Dawa pynjynsur ka FKJGP bad KSU ïaka hukum contaiñment ha War Jaiñtia

Syllad | The Rising MeghalayaApril 21, 2021

Ka Khasi Students’ Union (KSU) bad ka Federation of Khasi Jaintia and Garo People (FKJGP) na War Jaintia, hapoh ka jingialam Laitphar Syngkrem, president ka KSU bad u Reachingson Kongwang, Secretary ka FKJGP kila iakynduh ia u Deputy Commissioner, West Jaintia Hills ban pynjynsur ïaka hukum containment areas kaba la pynbna ha ki 6 tylli ki shnong bad ki jaka rung lane Entry Points na Dawki Amlarem Jowai road- Shnongpdeng, Dawki Boating Point bad Dawki PHC shaduh Tamabil.

U Sub Divisional Officer (Civil), Amlarem Sub-Division Abhilash Baranwal, IAS ula pynmih ka hukum haka 19 tarik u Iaiong bad bthah ia baroh ki nongshong shnong ban bud ryngkhi iaki hukum jong ka containment areas kaba la pynbna haka 13 tarik une u bnai.

Kane ka hukum kaba la pynmih haka 13 tarik u Iaiong kala pynbna ia ki 6 tylli ki shnong kaba kynthup iaka Shnongpdeng, Darrang, Kongwang, Lymba, Dawki, Bakur kum ka Containment Areas.

Kine ki ar seng haka 19 haka jingiakynduh ia u Deputy Commissioner ka District kila pynpaw ba kane kala buh jingeh iaki 6 shnong namar ba kila duh ka lad ban leit kamai kajih bad leit rep leit riang.

La kyntu ia u DC ban thaw lad thaw lynti ban pyllait noh ia ki paitbah na ka hukum containment areas ban pyntreikam da ka micro containment khnang ban nym ktah ia u luk u lak bad ka ioh ka kot jong ki.

Ka KSU bad ka FKJGP kala kynthoh ruh iaka tnad ka koit ka khiah ba hadien ba kila dep test bad mih ka result positive COVID-19 khlem kano kano ka jingiasyllok ne ki lad jingiarap ki shu ieh beit iaki nongpang ba ki shong kset ha iing bad lada dei kiba duk ki shem jingeh bha ban pynbiang iaka bam ka dih.

Haba iadei bad ka iew khappud kala pynhap haka kyrdan ba kadei kaba donkam ia u paidbah, hynrei ia ki paidbah na ki 6 shnong pat ym shah ba kin iashimbynta ha katei ka kam khaii khappud, ka KSU bad ka FKJGP kila kynthoh ba theh shilliang ka hukum containment areas bad ka ktah ia u paidbah salonsar.

Watla katta ruh ka FKJGP bad ka KSU kala kyntu ia u paidbah ba kim dei ban khein sting iaka khlam COVID-19 bad ki dei ban bud ryngkhi iaki kyndon bala pynbna da ka sorkar ban tem iaka jingpur ka khlam.