Dawa kyntiew kyrdan ia ka Mawsynram Block sha ka Civil Sub Division bad ka surok na Weiloi sha Balat

Syllad | The Rising MeghalayaMay 8, 2025

Ka kynhun ki nongialam shnong ka Mawsynram hapoh ka jingialam u MDC ka NPP u Bah Alvin Sawkmie ha ka 7 tarik Jymmang ki la leit iakynduh ia u Myntri Rangbah ka Jylla u Conrad K Sangma bad kyrpad ba un tuklar lem na ka bynta ban kyntiew kyrdan noh ia ka Mawsynram Community & Rural Development Block sha ka Civil Sub-Division bad kumjuh ruh ban shna noh ia ka surok na Weiloi sha Balat.

Haba kren sha ki lad pathai khubor hadien ka jingiakynduh ia u Conrad Sangma, u Bah Alvin u la ong ba kine ki artylli ki mat ki dei kiba la sahteng mynta la bun bun snem.

“Nga sngewkmen ban pyntip ba u Myntri Rangbah u la ai ha ngi ia ka jubab kaba sngewtynnad bad ngi kyrmen ba hapoh ka jingialam jong ka u, ka Mawsynram kan sa ioh ia kane ka surok thymmai na Weiloi shaduh Balat bad ia ka Mawsynram Block yn sa kyntiew kyrdan noh sha ka Civil Sub-Division ” ong u Bah Alvin.

Nalor kata une u MDC u la pynpaw ruh ba ki paidbah ka thain kin sa ioh shibun ki jingmyntoi lada ka sorkar kan ai ka jingmynjur ban kyntiew kyrdan ia ka Mawsynram Block sha ka Civil Sub Division namar kumba ka long mynta ki nongshong shnong na ki dong bad ki thain bapher bapher jong ka Mawsynram ki hap ban leit shaduh Shillong ban pyndep wat ia ki kam kiba rit ba ria bad kaba ktah jur ym tang ia ka por ka jong ki hynrei kumjuh ia ka pisa bad ka bor ka sor.

Nalor kata u Bah Sawkmie u la ong ba ka kynhun ka la ioh jingtip ruh ba la dep ban pynkhreh ia ka detailed project report (DPR) na ka bynta ban shna noh ia ka surok na Weiloi sha Balat bad na ka liang ka sorkar ka la kular ruh ban mang ia ka pisa kaba donkam lyngba ka World Bank.