Dawa ka Synjuk Waheh Shnong Ri Jaintia ban buh sa ar tylli ki kad khaii bad ka Bangladesh

Syllad | The Rising MeghalayaMay 22, 2025

Ban kyntiew ia kam khaii pateng hapdeng ki nongshong shnong ka Rilum Jaintia bad ka Bangladesh, ka Synjuk Ki Waheh Shnong Ri Jaintia ki la dawa ban buh sa ar tylli ki kad khaii ne ki Land Custom Station ha East Jaintia Hills District bad kawei pat ha Shnong Muktapur, West Jaintia Hills District.

Ka synjuk ka la pynpaw ia kane ka jingdawa ha ka dorkhas bala ai sha u Myntri Rangbah ka Jylla u Conrad K Sangma ha ka 21 tarik u bnai Jymmang ha Orchid Inn Thadlaskein.

Ha kane ka dorkhas ka synjuk ka la ong ba ka Rilum Jaintia ka dei ka thain kaba la kyrkhu da ka jingdon ki marpoh khyndew kum u dewiong, u mawshun bad u mawsalin ka Sorkar Jylla kala iohlum bun ka khajna na kine ki marpoh khyndew kiba shalan sha Bangladesh lyngba kad khaii na Tamabil, Dawki.

Ka synjuk kala kyntu ruh ia u Myntri Rangbah ban pyndep kloi iaka khana samari ne census namar hadien ka jingshah ktah na ka klam COVID, kane ka kam kala suki bad kala ktah shikatdei eh ia kiba duk bad suk.

Shuh shuh ka synjuk kala banjur ia u CM ban tuklar halor ka skim MGNREGS, ban kynthup biang iaka jingpyntrei retaining wall bad fencing hapoh ka skim namar ba ki long kongsan ha ki jaka nongkyndong. Nalor kata la dawa ruh ban pyllait pisa kloi na ka skim PMAY (G) ban lait shah ktah ki nongioh myntoi bad kyntu ban bthah iaka tnad ba dei peit ban bud ryntih iaka SOR ban lait shah ktah na ka jingkiew dor ki mar ki mata.

Ka synjuk kala dawa ruh ban buh iaki Special Rescue Team ha Rilum Jaintia ban pynkloi iaka jingiarap sha ki lanot pluh ding ki iing ki sem bad ki khlaw, ngam jyllop bad kiwei kiwei ki jingjia aksident kiba donkam jingiarap kyrkieh ha East Jaintia Hills bad West Jaintia Hills.

U Myntri Rangbah u la kular ban khmih bniah halor kitei ki jingdawa jong ka Synjuk.