Dawa ki samla ba pyndep pharmacist na ka Sorkar ban plielad ha ka iohkam ioh jam

Syllad | The Rising MeghalayaApril 12, 2025

Ka kynhun ki samla kiba la pyndep ia ka jingpule pharmacist bad kiba la register ka Jylla ha ka 11 tarik Iaiong ki la dawa na ka Sorkar Jylla ba kan thawlad ban pynbun ia ki lad ioh kam ioh jam na ka bynta ki samla kiba la pyndep ia ki jingpule pharmacist da kaba seng ia ki Pharmaceutical Industries ha ka Jylla.

Ia ka memorandum kaba iadei bad kane ka phang la aiti ruh da kane ka kynhun kaba kynthup ia u samla E Syiemlieh, B Sumer, W Suting bad R Kshiar sha ka Myntri ka Tnad ka koit ka khiah ka Kong Ampareen Lyngdoh da kaba kyrpad ruh ban shim lem ia ki sienjam kiba donkam ha kaba iadei bad kane ka bynta.

Da kaba kdew lyngba ki jingtip ba la ioh lyngba ka RTI, kine ki samla ki la ong ba haduh mynta kam pat shym la don kano kano ka jingthungkam lyngba ki jingpynbna laitkam ne Advertisement da ka Sorkar na ka bynta ki kam Pharmacist hapoh ka Directorate of Health Services.

“Halor kane, ngi kyrpad ia phi ban sdang ia ka jingthungkam lyngba ka lynti kaba khuid ba suba bad kaba kynthup lang ia ki Pharmacist, kata kynthup ia kiba bei tyngka bad ki bym bei tyngka da ka sorkar ba kin iakhun ia ka kam Pharmacist kiba lait,” ki la ong.

Nalor kata ki la aijingmut ruh halor ka jingdonkam ban pynbun ia ka jingdon ki nongtrei Pharmacist katkum ki kyndon ka IPHS ha baroh ki jaka sumar kum ha ki District hospital, CHC, PHC bad Sub Centre nalor ban thung kham bun ki Drug Inspector ha man la ki district ka jylla.