Dawa ki kynhun seng ka NEHU na ki heh ka MoE ban weng noh mardor ia u Prof Shukla

Syllad | The Rising MeghalayaMay 23, 2025

Ki kynhun seng bapher bapher ka skulbah North Eastern Hill University (NEHU) haka 22 tarik Jymmang ki la ban jur hakhmat ki arngut ki heh ophisar na ka Ministry of Education halor ka jingdawa ban weng noh mardor ia u Vice Chancellor Prof u PS Shukla ha ka jingwan jngoh jngoh ka jong ki ban bishar kam halor ka jingtreikam jong kane ka skulbah.

U Additional Secretary, u Sunil Kumar Barnwal (Department of Higher Education) lem bad u Director, Subrat Kumar Pradhan (Department of Higher Education) kiba dei na ka Ministry of Education ki la kyntait ban iathuh ia ka jingmih na ki jingialang ka jong ki bad ki kynhun bapher bapher jong ka skulbah kaba kynthup ia ki nonghikai, ki samla pule bad ki nongtrei.

U Barnwal u la shu pynpaw da kaba ong ba kane ka jingialang ka long kaba iaid beit iaid ryntih bad kaba  bha hashwa ba un mih noh na Administrative Block.

“Nga la shong ha ka jingialang kaba sngewtynnad bad ki nonghikai, baroh ki Dean, Head jong ki Department. Ka dei ka jingshem kaba sngewtynnad bad ka jingialang ka long kumba ju long bad ngin nangtrei kham bha,” ong u Additional Secretary.

Haba kren sha ki lad pathai khubor hadien ka jingialang, u president ka North Eastern Hill University Teachers’ Association (NEHUTA) u Prof Lakhon Kma u la ong ba ka jingialang ka la long kaba seisoh.

“Ka kynhun ka la wan hangne ban bishar bniah ia ka jinglong jingman bad kumno ngi pyniaid ia ki kam khlem ka jingdon u VC ba pura. Ka NEHUTA ka la pynsngew ruh halor baroh ki jingeh hakhmat kane ka kynhun,” u la pyntip.

“Ngi la pynpaw shai kdar ba ka jingwanphai jong u Prof Shukla sha kane ka skulbah kam dei ban long ka lynti,” ong u Prof Kma.

Haba kylli, u president ka NEHUTA u la ong ba kane ka kynhun ki heh ophisar bad ki kynhun seng bapher bapher jong ka skulbah ki angnud ban lah ban weng noh ia kane ka kynrum kynram kaba dang iai bteng hapoh kane ka skulbah. U la ong ruh ba ka kynhun ka dang pynkhreh ia ki sienjam hynrei iakane kin dang shim ia ka rai.

“Ki (ophisar MoE) ruh ki tip ba kam long shuh kaba lah ban shah ia ka jingwanphai jong u Prof Shukla shapoh ka campus. Kumta ngi ngeit skhem ba hadien kane ka jingialang bad ki namar la iohi kumba paw ba ki long kiba kloi ban wad ia ki lad ki lynti khnang ba ka NEHU kan wanphai biang sha ka jinglong jingman kaba iaid beit kumba ju long,” ong u Prof Kma.

Ha kaba iadei bad ka jingiaid jong ka jingtohkit ba la thung da ka MoE halor ka jingkynnoh bym lah treikam ki bor pyniaid ka NEHU, u Prof Kma u la ong, ” Ngi la kylli bad kine ki ophisar ka MoE ki la ong ba ki la pyndep ia ka jingtohkit bad ngi dang bishar ia kane, hynrei la iohi kumba ki la dep ban shim ia ka rai hynrei kim la pyntip ha ngi halor kane ka rai.”

U la ong ruh ba u Prof Shukla um shym la wan satia sha ka jingialang bad ka Pro Vice Chancellor ka Prof S M Sungoh ka dei kaba la pynbeit lut ia ki jingdonkam kiba iadei bad kane ka jingialang hapdeng ka kynhun na Delhi bad ki seng bapher bapher jong ka skulbah NEHU.

Haba pynpaw ia ka jingsngew hun hadien ka jingialang, u Vice President ka NEHUSU u samla Ricky Deiburom Rabon u la ong, ” Ka jingialang ka long kaba sngewtynnad bad ngi ai ka jingiaroh ia ka kynhun ka Ministry kiba la wan sha kane ka University ban sngap bad shah shkor ia ki jingeh jong ngi namar baroh shikatta ngi dang iai ap ia ka jingpynbeit ka ban lam sha ka jingbha. Hooid, ngi kyrmen ba ngin sa ioh ia ka rai kaba pdiang da baroh ki kynhun seng jong ka skulbah.

“Ka jingdawa ka jong ngi ka long kumjuh kumba long ha ki por kiba la dep, kata ba ngi ieng skhem la kalong kumno kumno ruh ba ngin ym pdiang shuh da lei lei ruh ia u Prof Shukla hapoh ka University ka jong ngi bad wat ki nongshong shnong ka Meghalaya ruh ki la pynbna ia u kum u briew uba kim pdiang shuh. Kumta ngin ym pdiang shuh ia u la ka long ha kano kano ka rukom ruh,” u la bynrap.