Dawa khang khyrdep ka KSU Wapung ia ka karkhana Abhi Coke Pvt Ltd

Syllad | The Rising MeghalayaAugust 25, 2023

Ka KSU Wapung Unit hadien baka la dep ban leit u jor sha ka Jaintia Hills Autonomous District Council (JHADC), ha ka 23 tarik mynta u bnai hapoh ka jingialam u president u Deiniwan Lyngdoh bad Shwari Ryngkhlem general secretary ha ka jingiasynran lang u Pynshai Kupar Dkhar assistant secretary KSU EJHDU bad Hamewanpynhun Ryngkhlem ki la leit ban ai da ka jingujor sa ha u Chairman Meghalaya State Pollution Control Board ban dawa khang kyrdep noh ia ka Abhi Coke Pvt ltd namar kam shym la ai satia kano kano ka jingmyntoi ia ki paidbah ka thain.

Ka KSU ka la ong ruh ba ka jingdon jong kane ka coke factory ym dei tang ba kam ai jingmyntoi ia u paidbah hynrei ka wanrah pynban tang ki jingma jingsyier ia ki paidbah nongshong shnong.

Nalor kata  Seng ka la ong ba ka la lap ruh  ba kane ka coke factory ka la pynkhein   ia ki ain ki kyndon jong ka EIA 2006 ha kaba iadei bad ka ka jingpynmih coke, namar katkum ka EIA 2006 kane ka coke ka dei ban pynmih ia u coke ha ka shisnem 25000 hajar metric ton  hynrei ka la pynmih ym duna ia ka 36000 metric ton  haka shisnem.

Na ka liang ka KSU ka la ong ruh ba kan ym shongthait satia hynrei kan iaid shaphrang ban dawa ban khang khyrdep ia kane ka Abhi Coke Pvt ltd.

Ha kajuh ka por ka KSU kala dawa ruh na u Chairman ka MSPCB ba dei ban tohkit bniah lyngba ka ophis jong ki ia kane ka coke bad kumjuh ha kaba iadei bad ki kyndon kumba la kdew da ka EIA.

Shuh shuh ka KSU ha u kyrwoh lyngba u Shibaitlang  Rymbai publicity Secretary KSU, Wapung Unit ka la pynpaw shai ba kan ym shongthait ban iai dawa katba kane ka coke kam pat khang kyrdep, kata wat lada kan shim por da ki snem ruh hynrei ka seng kan iaid skhem ha ka nongrim ba u paidbah un ioh ban im suk im sain bad ban ioh  ring mynsiem da ki lyer kaba khuid.

Na ka liang ka KSU ka pynpaw ruh ka jingkyndit bad lynngoh hadien ba ki briew jong kane ka coke ki la tyrwa ia ka seng da ka bai bnai lada kan pynsangeh noh ia kane ka jingdawa ka jong ka.

Hynrei, na ka liang ka KSU ka kren shai sha ki briew jong kane ka coke ba kin ym lah satia ban theid ia ki da lei lei ruh, bad kin iai ieng skhem ha la  ka nongrim kaba skhem ba kin ym shongthait ban iai dawa lada shim por da ki snem ruh.