Dawa ker railing ka HNYF iaki lynti iaid kjat ha Khliehriat

Syllad | The Rising MeghalayaJanuary 19, 2021

Ka Hynñiewtrep National Youth Front (HNYF) kala dawa na u Deputy Commissioner, East Jaintia ban shna noh da ki railing haki lynti ïaid kjat (footpath) ba don lynter ka surok bah Khliehriat, East Jaintia Hills District.

Ïa kane ka jingdawa ka HNYF ka la pynsngew haba ïakynduh bad u Deputy Commissioner u Bah E. Kharmalki ha kamra treikam jong u mynta ka sngi ba Ar.

“Ka jingdawa ban shna da ki railing ha baroh ki lynti ïaid kjat kata naduh Petrol pump Khliehriat, East haduh Petrol pump Dkhiah East ka long ban shngain ki nongleit nongwan khamtam ki khynnah skul bad ruh ban ym pynwit than ïaki kali ba ïaid ha surok bah,” ong u Damechwa Syrti General Secretary ka HNYF.

Ula ong kumba long mynta ka lynti ïaid kjat ka long kaba khim na kadaw ba ki nongdie madan ki pyndonkam ïaka footpath kum ka jaka die jingdie.

Kumta ka HNYF ka la kyntu ïa u DC ban shim khia noh kham kloi ban shna ïaki jingker nar khnang ban ïada ïaki nongleit nongwan bad ban wanrah ka jingitynnad ïaka sor Khliehriat.