Dawa ka VPP na ka MPSC ban pynsangeh shwa ia ka interview MPS namar ki kynrum kynram

Syllad | The Rising MeghalayaAugust 10, 2024

Ka liang pyrshah Voice of the People Party (VPP) ha ka 9 tarik Lber ka la dawa na ka Meghalaya Public Service Commission (MPSC) ba ka dei ban pynbeit shwa ia ki jingbakla bad ban pynsangeh shwa ia ka personal interview na ka bynta ka kam Meghalaya Police Service (MPS).

Ha ka shithi sha u Chairman ka MPSC, u Joint Secretary ka VPP u Bah Shemborlang Rynjah u la ong, “Ka party ka dawa jur ban pynbeit ia ki jingbakla bad ban pynsagen hnoh shwa ia ka personal interview kat bym pat lah ban pynbeit ia kane.”

Haba pynpaw ka jingsngewkhia halor ka jingjied ia ki nongiakhun na ka bynta ka personal interview sha ka kam MPS, u Bah Rynjah u la ong, “Na ka liang ka party hadien ba ka la bishar bniah ka la lap ia ki jingbakla ba jur halor kane ka bynta.”

Nalor kata u la ong ruh ba katkum ka jingpynbna kaba ha ka 2 tarik Nailar 2019, ka rukom jied kaba katkum ka vide Para 8 clause V (c) ka batai ba ka cut off ratio jong ki nongiakhun ban shah khot sha ka personal interview kan don ka jingpher kaba naduh 1:10 haduh 1:2.5 ka ban shong eh ha ka jingdon bun jong ki kam kiba lait.

“Wat lada shim ia ka ratio kaba rit eh kaba long 1:2.5, ka jingdon jong ki nongiakhun na ka bynta ka personal interview ka la dei ban long 42 ne 43 ngut na ka bynta ki 17 tylli ki kam. Hynrei ka jingdon jong ki nongiakhun kiba shah jied na ka bynta ka interview ka long tang 27 ngut katkum ka result ba la pynbna da ka Commission ha ka 25 tarik u Jylliew 2024,” u la ong.    

“Ka jingleh jong ka Commission ban pynduna ia ki nongiakhun ba shah khot sha ka personal interview ka long kaba pynmih ia u dak jingkylli, namar kam shym la don satia kano kano ka jingpynbna paidbah ba la pynbna da ka Commission ban pynduna ia ka jingdon ki nongiakhun katkum ka jingpynbna laitkam MPS,” u la bynrap da kaba ong, kaba kum kane ka jingleh da ka Commission ka la wanrah ka jingartatien bad ka jingsngewkhia kaba jur halor ka rukom jied ia ki nongiakhun.Nalor kata, ia ka jinglong hok bad kyntang jong ka Commission ka dei kaba pynmih ia u dak jingkylli,” ong utei u nongialam ka VPP.