Dawa ka VPP ia ka Sorkar ban buh kham bun ki jaka thoh eksam CUET ha ka Jylla

Syllad | The Rising MeghalayaMay 13, 2025

Ka Women’s Wing jong ka Voice of the People Party (VPP) haka 12 tarik Jymmang ka la dawa na ka sorkar jylla ba kan bun kham bun ki jaka thoh eksam Common University Entrance Test (CUET) hapoh ka jylla.

Ha ka shithi sha u Myntri ka Tnad pule puthi u Rakkam A Sangma, ka president ka Women’s Wing ka Kong Phileta Syiem ka la ong kiba bun ki samla pule ka jylla bad ki kmie ki kpa jong ki, ki pynpaw ka jingsngewkhia kaba jur namar watla ki la jied ia ka Meghalaya kum ka jaka thoh eksam ne Centre, hynrei kiba bun ki la shah pynngat pynban sha ki Centre kiba don shabar ka jylla kaba la wanrah ka jingeh kaba khraw hapdeng ki samla pule bad ki longiing longsem namar ka ktah jur ia ki jingpynbit pynbiang khamtam ha ka liang ka pisa tyngka na ka bynta ka bai leit bai wan sha kiwei pat ki jylla.

“Watla ngi la pdiang ia ka jingpyrshang ba dang shen jong ka National Testing Agency (NTA) ban pynkynriah ia kiba bun ki jaka thoh eksam na ka bynta ki samla pule ka jylla Meghalaya sha Shillong, hynrei ka paw shai ba kiba bun ki samla pule ki dang shah pynngat ban thoh ia ki eksam jong ki shabar ka jylla. Kane ka jinglong jingman ym tang ba ka pynthut ia ka jingpynkhreh ka jong ki ban ialeh ia ki eksam hynrei ka buh jingeh ruh ia ki samla ban lah ban lehbha ha kine ki eksam ba kongsan,” ka la pynpaw.

Ka president ka la aijingmut ruh ba ka sorkar ka dei ban thaw ia ka jaka aijingiarap bad online portal ha kaba ki samla pule ki lah ban pynrung kyrteng na ka bynta ki jaka thoh eksam jong ki.Kane kan iarap ban pynthikna ia ka jingdon jong ki samla pule kiba shah ktah.

Dawa Sorkar ia ka NTA ban pynkynriah ia ka eksam CUET na ka bynta ki samla ba ngat thoh shabar ka Jylla

Nalor kata ka Kong Phileta Syiem ka la ong ruh ba ka long kaba sngewsih namar wat hadien lai snem ba la sdang pyntreikam ia ka CUET naduh u snem 2022 hynrei haduh mynta ym pat shym la lah ban pynbiang ha kaba iadei bad ki jaka thoh eksam ha Meghalaya.

“Kumta ngi kyntu jur ia ka sorkar ba kan weng ia kane ka jingduna da kaba thaw shuh shuh ia ki jaka thoh eksam hapoh ka jylla khnang ban pynthikna ba ki samla pule kin lah ban ialeh ia ki national entrance test khlem jingeh ha ka liang ka pisa tyngka na ka bynta ka bai leit bai wan shabar ka jylla, bad sngewbha ban kynmaw ruh ba ka jingpyllait ia ka CUET kan pynduh lad ia ki samla pule jong ngi ia ka jingshemphang ba korodr ban iashim bynta ha ki entrance test ha ka national level bad ka ban khanglad ia ki ban aplai ia ki prokram ba pyniasoh lang ba la tyrwa da ka NEHU bad kiwei kiwei ki jaka pule shabar jong ka jylla. Ngi kyrmen ba phin shim ia kane ka mat kum ka kam kaba kyrkieh bad ban shim ia ki sienjam kiba biang ban pynthikna na ka bynta ki samla pule ka jylla kiba kwah ban ialeh ia ka eksam CUET UG ha ka jylla,” ka la bynrap.