Dawa ka VPP ban pynkloi thaw ia ka expert committee halor ka bhah thungkam

Syllad | The Rising MeghalayaAugust 18, 2023

Ka Voice of the People Party (VPP) lyngba u Dr Ricky AJ Syngkon, General Secretary haka sngi Palei ka la phah biang da ka jingthoh sha u Myntri Rangbah ka jylla u Conrad K Sangma ban kyntu ban pynkloi ban thaw ia ka expert committee ban bishar bniah biang ha kaba iadei bad ka bhah thungkam thungjam (job reservation policy) ha ka jylla.

Na ka liang ka VPP ka pynkynmaw ba ha ka jingiakynduh kaba la dep ha ka 13 tarik u Naitung ba la dep hapoh ka ophis treikam u CM, la pyntip sha ki ba na ka liang ka sorkar ka la jan dep ha kaba iadei bad ka jingthaw ia ka committee ka la jan dep bad kaba sah hi ka long tang ia u chairman, kata ka ban shimpor tang kumba ar ne lai taiew.

Hynrei mynta lah palat shi bnai ka la iaid naduh katei ka jingiakynduh kaba la dep hynrei kane ka kam ka la shu sahteng khlem poi shano shano ruh.

Kumta na ka liang ka Seng ka kyntu ia u Myntri Rangbah ba u dei ban pynkloi ban thung noh ia kane ka expert committee khnang ban lah ban pyniaid shakhmat ia kane ka kam kaba la sahteng.