Dawa ka NESO ban khang sbak iaka khappud Indo-Bangla ban tem iaka kam phrung tuh

Syllad | The Rising MeghalayaAugust 20, 2025

Ka North East Students’ Organization (NESO) ka la phah ia ka dorkhas sha ki Myntri Rangbah ki jylla ka thain Shatei Lammihngi kynthup ia ka Meghalaya ban dawa khang sbak ia ki jaka khappud ka Indo-Bangla bad ban pyntreikam ia ki ain ba pyrkhing ban lapdien mardor bad ban pynphai pat ia ki poiwir kiba dei napoh Bangladesh.

Ha ka dorkhas sha u Myntri Rangbah ka Jylla, u Conrad K Sangma, ka NESO ka la kyntu ruh ia ka sorkar ba kan pynkhlain ia ka jingpahara ban tehlakam ia ki jaka khappud bad ban peitngor khamtam ha kito ki jaka kiba laitlan da kaba pynjur ia ka jingdon ki bor pahara bad ki kor syntiat jong ka juk mynta.

Ka la ban jur ruh ia ka jingdonkam ia ka sorkar ba kan iatreilang bad ki jylla ba marjan lem bad ki tnad treikam ban pynthkna ba ia ki poiwir ym dei tang ban shu pynkynriah hapoh ka thain khnang ban pynneh pynsah bad iada ia ki hok jong ki trai ri trai muluk, ka kolshor, ka ktien ka thylliej, ka synshar khadar bad ka jinglong trai halor ka khyndew ka shyiap lyngba ki ain bad ki polisi bapher bapher.

Ka NESO ka la dawa ruh ban thung ia ka Special Review Committee ban leh ei ei halor ka jingkiew kynsan ka jingbun paid ha ki katto katne ki jaka.

“Ngi kyntu ia ka Sorkar India bad sorkar Jylla ba kin shim khia ia kane ka kam kum ka mat kaba donkam kyrkieh. Ki jingkylla ha ka jingdon jong ki briew bad ka kolshor ki la dep ban paw shynna ha ki katto katne ki bynta ka thain ka jong ngi kiba long ka dak jingma kaba khraw ia ki trai ri trai muluk. Lada ym lah ban shim mardor ia ki sienjam kiba pyrkhing, ka jinglong kyrpang jong ki trai muluk jong ka thain Shatei Lammihngi ka lah ban wanrah ka jingkylla ka ban ym lah shuh ban leh ei ei,” ong u Chairman ka NESO u Bah Samuel B Jyrwa ha ka shithi.

U la ong ba naduh kine ki phew snem kiba la dep ka thain Shatei Lammihngi ka la mad ia ka jingeh jingtynjuh na ka jingbym lah ban tehlakam ia ka jingwan rung kyrthep jong ki mynder ri. Kane ka jingeh ka la sdang naduh ba ka India ka la ioh ia la ka jong ka jinglaitluid ha u snem 1947, bad katba nang iaid ki sngi ki por ka la kylla long kawei na ki jingman kaba khraw ia ka imlang sahlang, ka jingdon ong ki jaidbynriew bad ka jingskhem ka synshar khadar ha ki jylla jong ngi.

Da kaba pynpaw ba ki jingma ki long kiba shyrkhei, u Bah Samuel u la ong ba ka nuksa jong ka Tripura ka dei kawei kaba sngew shyrkhei eh ha kaba ki trai muluk kiba shisien ki la long kiba bun paid hynrei mynta ki la kylla long ki rit paid ha la ka jong ka ri ki longshuwa manshuwa. Ka Assam ruh ka la shah ktah jur bad kaba la lam sha ka jingiakhih pyrshah mynder kaba neh haduh hynriew snem bad kaba la kut noh da ka jingiasoi ia ka Assam Accord ha u snem 1985.

U Bah Samuel u pynkynmaw ruh ba ka Meghalaya ka la mad ia ki jingiakhih kiba iai bteng, ha u snem 1979, 1987 bad ha kaba sdang jong ki snem 1990, bad baroh ki dei kiba mih na ka jingma halor ka jingkylla ha ka jingbun briew bad ka jingshah knieh noh ki hok jong ki trai ri trai muluk.

“Mynta, ka jingeh ka la nangjur bad ka Assam ka la sakhi ia ka jingkylla ha ka jingdon ki jaidbynriew bapher bapher ha ka jylla.Kane ka jingkylla ha ka jingdon ki jaidbynriew kam dei tang ha kawei ka jylla, hynrei ka la saphriang sha kiwei ruh kumjuh, khamtam sha ki jaka them ka Rilum Garo ha Meghalaya bad ha kiwei pat ki bynta jong ka thain Shatei Lammihngi,” u la ong.

U Bah Samuel u la ong ba ka NESO kala iai buh la bunsien ia kane ka mat hakhmat ka Sorkar India ban kyntu ban shim ia ki sienjam kiba khlain bad kiba iai neh, hynrei kaba sngewsih ka long ba ka jubab kam pat biang satia ha kaba bunsien ka kut noh tang ha ki sienjam ba shipor ha ka jaka ban shim ia ki sienjam kiba bniah bad kiba neh bad kaba la buh ia ki trai muluk jong ka thain ha ka jingma kaba khraw, bad ha kiba bun ki khep la pynbor ia ki ba kin hap ban mih ban iada ia la ka hok, ka riti dustur bad ka jinglong ba kyrpang.