Dawa ka KSU na ka NLU ba kan pynkylla mardor ia ki kyndon thungkam Assistant Professor

Syllad | The Rising MeghalayaJune 18, 2025

Ka Khasi Students Union (KSU) ka la dawa na ka National Law University (NLU), Meghalaya ba ka dei ban pynkylla noh mardor ia ka jingpynbna laitkam (Advertisement) ba dang shen na ka bynta ki kam Assistant Professor bapher bapher hapoh ka skulbah.

Ha ka shithi sha u Registrar ka University, ka KSU ka la pynpaw ia ka jingsngew pyrshah halor ka jingpynbna laitkam ba la pynmih da ka National Law University, Meghalaya ha ka 9 tarik Jylliew 2025 na ka bynta ki kam Assistant Professor bapher bapher kaba la dawa na ka bynta ban don ia ki kyrdan kiba palat pud ia kiba hap ban pynbiang da ki nong aplai kiba dei ki trai jylla.

“Kumta ngi kyrpad ia phi da ka jingsngewrit ban wanrah ka jingpynkylla ha ka jingpynbna lait kam ba la kdew lem kumta kin ym don ki kyrtong trai jylla kiba kwah ban aplai bad kumjuh ruh kin ym don ki trai jylla ki ban lah ban kynjoh kum ki nonghikai ha ka NLU Meghalaya,” ong u kyrwoh ka seng.

Ka KSU ka la kynnoh ba ha katei ka jingpynbna ba la kdew, ka kyrdan kaba rit tam ba la buh na ka bynta ka kam Asst Professor ka long ha ka kyrdan Academic Level 11 kaba long pyrshah ia ki kyndon tynrai jong ka jingpynrung kam bad wat pyrshah ia ki kyndon jong ka UGC. Ka Academic level 10 ka dei ka kyrdan kaba la pdiang ha ka kam hikai na ka bynta ka kam Asst Professor. Ia ka Academic level 11 la ioh lyngba ka jingkyntiew kyrdan hadien ba la pyndep saw snem ne palat jong ka jingshakri bad don ia ka PhD nalor kiwei pat ki bynta.

“Ia kane ka nongrim ba kongsan la pyntreikam ha baroh ki 26 tylli kiwei pat NLU kiba don ha ka ri ha kaba ia ka kam Asst Professor, ka jingdonkam ia ka kyrdan pule ka long ha ka kyrdan kaba 10 ban ioh rung, kumta balei ka NLU Meghalaya ka pan ia ka kyrdan kaba 11 kum ka kyndon kaba rit tam ban ioh rung katba kiwei pat ki NLU ha ka ri ki iaid da kumta. Ka daw ba kongsan ka long ba u Vice Chancellor um kwah ban pynrung ia kino kino ki briew na ka jylla,” ong ka seng da kaba bynrap, “Ban pynskhem ia kane ka jingkam ka jong ka, ka Seng ka kwah ban pynrung ia ki 10 tylli ki jingpynbna lait kam ba dang shen na ka bynta ka kam Asst Professor ba la pynmih da kiwei pat ki NLU ha kylleng ka ri India ha kaba ngi ioh ia ka jingiapher kaba khraw ha ki kyndon ba la buh da ka UGC ha kaba kane ka jingpynbna kan long pyrshah ia ki kyndon jong ka UGC.”

Nalor kata ka KSU ka la kynnoh ruh ba kiwei pat ki kyndon kiba la buh palat pud ki long 60% ne 7.00 CGPA ha ki kyrdan pule kiba kham hashwa kaba ym ju pan ryngkat bad kiwei pat ki kyndon halor jong ka. Kane ka kyndon ka dei kaba la long wat ban aplai ia ka kam Registrar ia kaba la pynbna ha ka 24.04.2025.

“Watla ym shym la kdew kyrpang ha ka jingpynbna, hynrei ki nong aplai kiba la biang na ka bynta kum kane ka kam hynrei kiba duna ia ka percentage kumba la kdew ha kano kano ka snem jong ka jingpule jong ki, kim lah ban aplai ia kane ka kam. Kane pat ka dei kawei pat ka jingpyndonkam beain da u Vice Chancellor pyrshah ia ka jingpynbna,” bynrap ka seng.