Dawa ka JSU ban buh ia ka jaka thoh eksam CUET ha Jowai

Syllad | The Rising MeghalayaJune 7, 2025

Ka Jaintia Students Union (JSU) Shillong Circle haka sngi Thohdieng ka la leit iakynduh ia u Commissioner & Secretary u Vijay Kumar Mantri ban kyntu ia u ba un iakren bad ka sorkar kumjuh bad ka National Testing Agency na ka bynta ban buh ia ka jaka thoh eksam Common University Entrance Test (CUET) ha Jowai, West Jaintia Hills.

Na ka liang u Adviser jong ka seng u Bah A Suchiang u la ong ba kumba ka long mynta, kiba bun ki samla pule na Rilum Jaintia ki la hap ban leit sha ki jaka kiba jngai kum sha ka nongbah Shillong lane sha kiwei pat ki Centre kiba jngai ban ialeh ia ka eksam CUET.

U la ong ba kane ka la buh jingeh shibun ia ki samla kiba kwah ban iakhun ia kane ka eksam CUET namar ka jingjngai ha ka leit ka wan namar ki la hap ban mih na la iing naduh dang step phyrngab bad wanphai iing haduh ka por janmiet kaba wanrah ka jingkhuslai bad ka jingtlot jingswai khamtam ha kaba iadei bad kum kine ki eksam kiba kongsan bha.

Nalor kata u la ong ba ka jingdheng kali ha ka nongbah Shillong ka dei sa kawei pat ka jingeh na ka bynta ki samla pule ha kaba bun na ki samla ki la mad jingeh namar ka jingpoi slem sha ki jaka thoh eksam.

Kawei pat ka jingeh ka long ruh khamtam ia kito ki samla pule ka thain kiba wan na ki longiing kiba duna ha ka liang ka ioh ka kot namar ki hap ban pynlut bun ka pisa na ka bynta ka leit ka wan, ka bam ka dih bad ha ki khep wat ki jaka sah lada ki jaka thoh eksam ki dei kiba kham jngai.

Une u nongialam ka seng u pyntip ruh ba ha kane ka jingiakynduh, na ka liang u Commissioner & Secretary u la kular ba un sa phah ia ki ophisar ba kin jurip ia ki katto katne ki jaka pule ne kino kino ki cente na ka bynta ban buh ia kine ki jaka thoh eksam CUET ha Rilum Jaintia.

“Na ka liang ka JSU ngi long kiba kloi ban iatreilang bad ka sorkar bad ban ai ia kino kino ki jingiarap na ka bynta ban pynthikna na ka bynta ka jinglah ban thaw ia kine ki centre thoh eksam CUET ha Jowai na ka bynta ka jingmynroi jong ki samla pule ka thain,” bynrap u Adviser ka seng.