Dawa ka JSU ban sdang noh ia ka klas miet ha KNGC bad klas step ha GBHSS

Syllad | The Rising MeghalayaMay 22, 2025

Ka Jaintia Students Union (JSU) haka 21 tarik Jymmang ka la dawa na ka sorkar jylla ba kan sdang noh da ka klas miet ne Evening Class hapoh Kiang Nangbah Government College (KNGC) bad ka klas step ne Morning Section ha Government Boys’ Higher Secondary School (GBHSS) Jowai khnang ban lah ban pynrung klas kham bun ia ki samla namar ka jingiakynduh jingeh ha kaba iadei bad ka jingioh rung klas.

Ha ka dorkhas ba la aiti sha u Myntri Rangbah ka Jylla u Conrad K Sangma, ka JSU ka la ong kumba ka long mynta ka jinglah ban pdiang klas ia ki samla pule hapoh KNGC ka long tang 350 ngut na ka bynta baroh ki ar section A bad B ha ka Morning bad Day, katba ka GBHSS ka dang kham duna shuh shuh, kata dang 115 ngut ki samla pule ha baroh ki ar section.

“Namar kane ka jingduna ban lah pynrung klas ia ki samla pule bad ka jingjur ka jingdawa na ka bynta ka jingpule ha ka kyrdan Higher Secondary, ngi kyntu jur ia ka sorkar ba kan sdang noh ia ka klas miet ha KNGC bad ka klas step ha GBHSS khnang ban lah ban pynrung kham bun shuh shuh ki samla pule,” ong ka dorkhas.

“Nalor kata ngi kyrshan jur ia ka jingai jingmut ban pynheh shuh shuh ia ki jingtei ne building ha baroh ki artylli ki jaka pule khnang ban kyrshan halor ki jingpynroi kiba neh ha kaba iadei bad ki jingtei bad ban nang lah ban pdiang shuh shuh ia ka jingnangkiew ha ka jingdon jong ki samla pule hapoh ka thain,” bynrap ka JSU.

Ka JSU ka la ong ruh ba ka jingshim khia halor kane ka phang kan iarap ban weng ia kane ka jingeh kaba dang iai mynta namar ka jingbym ban pdiang kham bun ki samla pule ha ki jaka pule kaba la pynlong ia kiba bun ki samla ba kin ym ioh ia ka lad ban rung klas bad ban bteng ia ki jingpule ha ki kyrdan higher secondary.