Dawa ka JSU ban pyrkhing bad khang internet haba pynlong ia ki eksam thungkam

Syllad | The Rising MeghalayaJune 19, 2025

Ka Jaintia Students’ Union (JSU) ka la dawa na ka sorkar ba kan shim ia ki sienjam kiba pyrkhing kynthup ka jingkhang shipor ia ka internet khnang ban pynthikna ba ka jingpynlong ia ki eksam thungkam sorkar kin long kiba khuid ba suba.

Ka JSU ha u kyrwoh ka pynpaw ba ka la ioh pdiang ia kiba bun ki jingujor ha kaba la kynnoh ba kila don ki kam leh thok bad ki jingleh bym hok ha ka por ba pynlong ia ki eksam ha ki katto katne ki jaka lyngba ka jingpyndonkam ia ki mobile phone.

Ha ka shithi sha u Symbud Myntri Rangbah ka Jylla uba khmih ia ka Tnad Kam Pohiing, u Bah Prestone Tynsong, ka JSU ka la ong, “Ngi ngeit skhem ba ka jingpyntreikam ia ka jingkhang shipor ia ka internet ha ki kynta pynlong ia ki eksam iakhun kam kan lah ban khanglad kumba 50-60% ia ki kam thok lyngba ka online.

“Khamtam ha kaba kum kane ka juk Artificial Intelligence (AI), ia ka kor AI lah ban pyndonkam bakla da ki nongiakhun kam ha ka por pynlong ia ki eksam. Lyngba ka jingiarap jong ki smartphone, ki smartwatch lane ki tiar ba buhrieh ki nongiakhun kam ki lah ban ioh da kaba suk ia ki apps kiba don ha ka AI lane ki chatbots kiba ai mardor ia ki jubab kiba thikna,” ong ka JSU da kaba bynrap, “Ba kane ka long kum ka jingpynioh kabu ka bym hok bad kaba pynduh noh ia ka jinglong ba kyntang ha ka rukom pynlong ia ki eksam.”

Haba pynksan halor ka jingdonkam ban peitngor ban pyrkhing bad talasi hapoh ki jaka thoh eksam, ka JSU ka la ong ba dei ban pynlong ia ka jingtalasi ha ki khyrdop ban rung sha ki jaka thoh eksam khnang ban lap bad ban kahnglad halor kano kano ka jingpyndonkam ia ki tiar kiba long beain ha ki kamra thoh eksam.

Nalor kata ka la ban jur ruh halor ka jingdonkam ban pyndait ia ki CCTV camera ha man la ki jaka thoh eksam khnang ba kan yn pynshlur ia kino kino ki kam beain bad kan iarap ban pynthikna ia ka jingiaid beit bad ka jingkhuid ha ka jingpynlong ia ka eksam.

“Khnang ban pynioh shuh shuh ia ka jingshaniah jong ki paidbah ha ka rukom thungkam thungjam, ngi ai jingmut ban pyndait ia ki CCTV camera ha ka por ba pynlong ia ki interview. Kane ka sienjam kan wanrah ka jingshai kaba kham bha bad kan pynduna ia kino kino ki lad jong ki kam bym hok ne ki jingleh shiliang khmat,” bynrap ka JSU.                   

“Ngi ngeit ba lada ka sorkar kan shimkhia ia kine ki sienjam kiba pyrkhing bad ban pyntreikam ia ki, kan iarap shibun ia kito kiba trei shitom bad kiba kwah kam ha kylleng ka jylla. Kane kan iarap ruh ban pynioh ia ka jingshaniah hapdeng ki samla bad ki paidbah ha kaba iadei bad ka jingthungkam thungjam bad ha ki jingtreikam jong ka sorkar,” ong shuh shuh u kyrwoh ka JSU.