Dawa ka HYC bad CoMSO ia ki national media ban pan map ba pynthohbria ia ka jylla Meghalaya

Syllad | The Rising MeghalayaJune 10, 2025

Ki sengbhalang ka jylla haka sngi Nyngkong ki la dawa na kiba haiing hasem jong ki shijur na Indore bad na ki national media ba ki dei ban pan map mardor namar ka jingpynthohbria bad pynbudnam sniew ia ki tnad treikam ka Meghalaya ba kim larkam ha ki rukom treikam bad banjur ia ka jingdonkam ban pyntreikam noh mardor ia ka Inner Line Permit (ILP) ha ka jylla.

“Ngi dawa da ka jingpan map paidbah na ki national media channel namar ka jingpynmih ia ki khubor ki bym jingshisha halor ka jingjia bad na u Vipul Raghuvanshi u hymmen jong u lanot ba shah pyniap uba la kynnoh ia ki tnad treikam ka Meghalaya ba kim larkam kaba lam ruh sha ka jingjia ba sngewsih ia u para jong u, u Raja bad ka jingjah klet bad mynta ka jingmih paw biang jong ka Sonam Raghuvanshi. Ngi dawa ruh ia ka jingpan map na u Vipul bad u Devi Singh u kpa jong ka Sonam uba la iai bteng ban khein troin bad pynthohbria hakhmat u paidbah ia ki tnad treikam jong ngi bad sdang ban kynnoh sniew ia ngi baroh ki nongshong shnong ka Meghalaya bad khamtam eh ia ka jaidbynriew jong ngi,” ong ka seng HYC lyngba u kyrwoh.

“Ngi kum ka imlang sahlang bad ki nongshong shnong ka jylla ngi la shah kynthoh, shah kynnoh, shah pynjah burom naduh kine ki khyndiat taiew ba la dep. Ki briew jong ngi ki la iatrelang bad ki bor sorkar da kaba ai ia ki jingtip ba kongsan bad iarap ha ka jingwad ha la ka jong ka bor. Hynrei, la buh jingkylli bad suba sniew bad pynthohbria ia ngi hapoh ka ri bad ha ka pyrthei. Kane kam dei kaei kaei ruh hynrei ka dei ka jingpynpaw kaba don tynrai jong ki jaka ri thor ka India pyrshah ia ki riewlum jong ka thain Shatei Lammihngi, ” ka la ong.

Ha kajuh ka por ka Confederation of Meghalaya Social Organizations (CoMSO) kala ong ba ka iengskhem halor ka jingdonkam kyrkieh ban pyntreikam noh ia ka Inner Line Permit (ILP) ha Meghalaya.

“Jin da la pyntreikam ia ka ILP, ka iaid ka ieng jong ki briew kiba nabar kan dei kaba la bishar bniah bad buh rekod. Kan don ruh ka atiar kaban buh ia baroh kiba wan rung ban don ia ka jingkitkhlieh ha kaba iadei bad ka ain ka kanun, khamtam ia kito baroh kiba wan kum ki nongjngohkai hynrei kiba don pat ia ka jingmut kaba sniew ne ban pynmih ia ka jingbym shngain” ka la ong bad bynrap “Ka ILP ka pynthikna ba kum kitei ki khana kin dei kiba la shimkhia da ka lynti jong ka ain bad ym da ka jingmutdur kaba klumar. Ka ai ruh ia ki lad jingiada ia ka jingshah pynthohbria jong ka kolshor bad kaj ingshimkabu ia ka jingleh bha. Ka jingdon ia ki jingduna ha ka State Guest Registration bad Tourist Monitoring System kim dei tang ki jingpeit jngai jong ki bor synshar hynrei ki dei ki jingduna kiba ailad ia ka jaidbynriew jong ngi ban ym shah burom, ban sngewthuh bakla bad ban kylla long kum ki langknia ha ki por ba mih ki jingeh”.

Ka CoMSO kala kyntu ruh ia u Myntri Rangbah ka jylla u Conrad K Sangma, ban leh da kaba tyngeh katkum ka ain hapoh jong ka Criminal bad Civil Laws pyrshah ia kito kiba pynthohbria ia ka jylla, kiba pynsaphriang ia ka jingiapher jaidbynriew bad pynthud ia ka jingtohkit da ki bor jong ka ain.

Nalor kata ka la kyrpad ruh ia ka sorkar India ban ai iaka jingpynshai hapoh Parliament ne lyngba ka Ministry of Home Affairs ban pynskhem ia ka jingtbit jong ka tnad pulit ka Meghalaya, ka jingjop ha ka jingtohkit jong ka bad halor ka bynta ba la shim da ki  trai shnong bad ka NDRF ban lap ia ka jingshisha baroh halor katei ka jingjia.