Dawa ka HITO ban weng mardor  ia u post Ilektrik ba buh jingma ha Dong pdeng, Mawryngkneng

Syllad | The Rising MeghalayaApril 27, 2024

Ka Hynñiewtrep Integrated Territorial Organization (HITO) Mawryngkneng Area ka pynpaw ka jingsngew khia kaba jur halor ka jingdon uwei u post ilektrik ha dong pdeng shnong Mawryngkneng uba buh jingma shibun ia ki paidbah nongshong shnong bad ki nongleit nongwan bad kaba la poi ruh sha ka jingmynsaw jong uwei u khynnah rit.

U bah Gary S Myrboh, President ka Mawryngkneng Circle ula ong ruh ba na ka liang ki nongshong shnong la bun bunsien ki la leit ban ujor sha u rangbah dong bad sha ka ophis ka MeECL hapoh ka thain hynrei ym shym la don ba pynsngap.

Nalor kata ka Seng ka la ong ba ka la ju don teng ruh ka jingmynsaw jong ki briew bad ka jingiap jong ki jingri na ka jingshah bat ha ka bording lyngba utei u post khamtam lei lei ha ka por slap bad kaba lah ruh ban lam sha ka jingjia ba sngewsih.

Kumta ka Seng ka dawa jur na ka tnat ba dei khmih ba ka dei ban pynkynriah noh mardor ia utei u post ilektrik na katei ka jaka sha ka jaka kaba kham biang khnang ban lait na kino kino ki jingma bad ki jingjia ba sngewsih kiba lah ban wan jia ha kano kano ka por.