Dawa ka FKJGP ban seng ia ka RSETIs ban iarap ai kam ia ki samla hapoh East Jaintia Hills

Syllad | The Rising MeghalayaJune 18, 2024

Ka Seng Federation of Khasi Jaintia and Garo People (FKJGP) ka la dawa na ka bynta ban buh ia ka Rural Self Employment Training Institutes (RSETIs) ha East Jaintia Hills District khnang ban plie lad plie lynti ia ki samla ka thain ha ka liang ka ioh kam ioh jam.

Ha ka shithi ba la phah sha u convener jong ka State Level Bankers Committees (SLBC) ha ka 18 tarik Jylliew, u president ka FKJGP, East Jaintia Hills, u Bah Deihok Sumer u la ong, “Khnang ban lah ban tehlakam ia ka jingkyrduh kam hapdeng ki samla jong ka district jong ngi, ngi kyrpad jur ia ka ophis jong phi ban seng ia ka RSETI hapoh ka district jong ngi khnang ba kan long ka jingiarap kaba khraw na ka bynta kine ki samla.”

Nalor kata u la ong ruh, “Ka jingseng ia kane ka jaka aijinghikai hapoh ka district ka jong ngi kan kyntiew ha kaba iadei bad ka liang ka iohkam ioh jam jong ki samla ha ki institution bapher bapher, bad ka ban pynlong ruh ia ki samla ba kin lah ruh wat ban sdang ia la ki jong ki kam ki jam katkum ka sap treikam kaba ki ioh lyngba ki jinghikai na kane ka Institute.”

Shuh shuh u la ong ruh ba ki samla kiba don ia ka sap ka phong kaba kham tbit bad kham biang ha ki jinghikai kiba ki la ioh pdiang lyngba ka institute kin lah ban ioh ia ka jingshaniah ha lade bad ka ban pynshlur ruh ia ki ba kin kylla long ki nongseng kam lajong ba ki ban lah ruh ban plielad ruh ia kiwei pat ki samla ha ka liang ka ioh kam ioh jam.