Dawa ka FKJGP ban khang iaka jingshalan dieng beain shabar Jylla

Syllad | The Rising MeghalayaOctober 4, 2023

Ka seng Federation of Khasi Jaintia and Garo People (FKJGP) Khliehriat Circle kala ai da ka dorkhat sha u Chief Forest Officer (CFO), Jaintia Hills Autonomous District Council (JHADC) bad sha u Divisional Forest Officer (DFO) Jaintia Hills Territorial Division, ban dawa ban khang iaka jingshalan ia baroh ki jait dieng beaiñ ki bym biang ia ki kot ki sla kiba mih naki khlaw bad naki sawmill beaiñ sha bar ka Jylla jong ngi katkum ka ain Forest Act.

Ia kane ka dorkhat la leit ban aiti da u president FKJGP Khliehriat circle Mishal Chyrmang haka jingiadonlang Marhok Marboh vice president ka FKJGP-Jaintia Hills Zone bad kiwei kiwei ki dkhot haka sngi Balang.

Ka FKJGP kala ong ba kala ioh shibun ki jingujor na u paidbah baka jingshalan tuh ia ki dieng sha bar ka Jylla bad haka dor kaba rem bad buh jingeh kylla iaki trai jylla ban ioh ia ki dieng hapoh ka Jylla kaba la wanrah jingeh ia u duk u suk ban shna iing shna sem.

Shuh shuh ka seng FKJGP kala ong ba ki bar jylla kiba khaii dieng ki wan thied iaki dieng haka dor kaba rem na ki sawmill ban pynbiang dieng ia kiwei ki jylla kaba buh ruh iaka jingma iaka jylla naka jing syllen ki khlaw ki btap.

Ka FKJGP kala byrthen ban aipor ar taiew ban khang ia ka jing shalan dieng tuh khlem ki kot ki sla ba biang shabar ka Jylla lada ka seng FKJGP ka dang lap wat hadien katei ka por kan bat hi iaki dieng beain bad kine ki ar tylli ki ophis kiba peit iaka kam khlaw ki hap ban bah Khlieh.