Dawa ka EJNC ban kem ïa u Vicky Dey halor ka jingkren tohmet bad wanrah ia pher jaidbynriew

Syllad | The Rising MeghalayaAugust 31, 2021

Ka East Jaintia National Council (EJNC) ka la dawa na ki bor jong ka aiñ ban thwet bad kem mardor ïa u Vicky Dey uba la kynnoh kren tohmet da ki kyntien kiba kynshoit ba lai phew jait ïaka jaidbynriew Khasi bad ki nongshong shnong ka Jylla.

Ka EJNC kala phah da ka shithi ujor sha u Director General of Police lyngba ka ophis u Superintendent of Police East Jaintia Hills haka sngi ba Ar.

Ka jingkren tohmet une u Vicky Dey ka lah ban wanrah iaka jingiasngewpher jaidbynriew bad kalah ruh ban buh jingma ïaki khun samla ka Jylla kiba pule ha ki kyrdan bapher bapher shabar jong ka Jylla kumjuh kiba trei shabar ka Jylla namar katkum ka jingpynpaw jong u lyngba ka rynsan khubor paidbah (social media) kaba u kyrpad ïaki nongkyrshan jong u ba kin shoh kin dat ïaki jaitbynriew Khasi kiba don sha kiwei ki Jylla, la ong u Sambormi Lyngdoh President EJNC.

Ula ong halor kane ka nongrim da ka jingsngewkhia ïaka ri bad ka Jaitbynriew ka EJNC ka la phah shi syndon da ka jingujor sha u Director General of Police ba un shimkhia ïa kane ka kam ban leh ia kaba donkam

Ula ïathuh ba haka jingujor ka EJNC ka la pynpaw ïaki kam beaiñ bad ka jingthmu jong une u Vicky Dey ban wanrah ka jingïapher jaitbynriew ne jingïapher niam hapoh ka ri India nalor ba ula kam ba ki Bengali kiba shong ba sah ha Jylla ki shah niewbein bad shah thombor.