Dawa ka BJP na ka Sorkar Pdeng ban buh ia ka dur u Tirot Sing hapoh Parliament

Syllad | The Rising MeghalayaJuly 17, 2024

Ka Seng Bharatiya Janata Party (BJP) Meghalaya ka la dawa na ka Sorkar Pdeng ba kan ai ka jingithuh da ka Ri hi baroh kawei ia u nongialeh laitluid u Syiem Tirot Sing da kaba pynioh jaka ia ka dur jong u ha ki kynroh jong ka iingdorbar Parliament.

Ia kane ka jingdawa ka BJP ka la pynpaw ha ka jingrakhe ia ka lyngkhuh sngi iap ba 189 snem jong u Syiem Tirot Sing ha ka 17 tarik Naitung ha ka jingialang kaba la long hapoh ka ophis treikam jong ka.

Kumjuh ruh ka party BJP ka la bteng ruh ia ka jingkyrpad ba la slem jong ka na ka Postal Department ba kan pyllait ia ki stamp ban kynmaw burom ia une u khla wait ka jaidbynriew bad kyntu ia ka Ministry of Education ba kan kynthup ia ka khana jong u ha ki kot histori jong ki skul khnang ba kane ka jinglen lade ka jong u kan pynshlur bad ai mynsiem ia ki pateng ki ban wan hapoh ka Jylla bad ka Ri hi baroh kawei.

Ha kane ka jingialang la aijingkren da u State Vice President u Bah Bah Khrawbok Basaiawmoit, u National Council Member u Bah David Kharsati bad u nongaiktien ba halor ka party ha ka jylla u Bah Mariahom Kharkrang, Dr. Fenela Lyngdoh Nonglait ha ka jingiadon lang ki nongkitkam bad nongtrei jong ka party.

Ka Seng BJP ka la rakhe ruh ia kane ka sngi kyrpang lyngba ki prokram bapher bapher ba la pynlong ha ka nongbah ka jylla bad ki district bapher bapher. Ka Mahila Morcha ka Jylla ha ka jingialam jong ka President ka Kong Susuki Pariat bad ka kynhun ka BJYM ba la ialam da u president u Mebaker Lyngdoh ki la leit ruh ban buh syntiew ha u mot dur jng u Tirot Sing hapoh State Central Library bad hadien da ka jingpynkhuid shnong ha ka nongbah ban pynphriang ia ka khana shaphang une u nongialeh laitluid ba khraw.