Dawa ka AJMRWLU ban pyntreikam ia ka minimum wages bathymmai naduh u Risaw 2023

Syllad | The Rising MeghalayaMay 15, 2025

Ka All Jaintia Muster Roll Workers & Labour Union (AJMRWLU) haka sngi Balang ka la dawa na ka sorkar jylla ba kan pyrkhat biang ia ka tarik ban pyntreikam ia ka minimum wages kaba thymmai khnang ban pynthikna ba kan sdang ban treikam naduh ka 1 tarik u Risaw 2023.

Ha ka shithi sha u Myntri Rangbah ka jylla u Conrad K Sangma, ka President ka Union ka Kong Meri Shangpung ka la ong, “Ngi kyntu da ka jingsngew rit ia u Myntri Rangbah ban pyrkhat biang ia ka tarik pyntreikam ia ka minimum wages kaba thymmai bad ban pynthikna ba kan treikam naduh ka 1 tarik Risaw 2023, kata da kaba bud ryntih ia ki kyndon jong ka Act bad na ka bynta ka jingleh hok bad da ka lynti kaba khuid na ka bynta baroh ki nongtrei.”

Haba pynpaw katkum ka ain jong ka Minimum Wages Act, 1948, ka la ong ba la bthah ba ka sorkar jylla ka dei ban pynkylla ia ka minimum wages na ka por sha ka por bad ka ban ym palat ia ka san snem. Ka jingpynkylla kaba khatduh ia ka minimum wages ha Meghalaya ka la long naduh ka 1 tarik u Risaw 2018.

“Katkum kane ka jingpynkylla kaba bud ka la dei ban long ha lane shwa ka 1 tarik Risaw 2023. Hynrei ngi la ioh jingtip ba ka jingpynbna kaba dang shen ka la shim ia ka tarik ban pyntreikam ia kane ka jingsiew kaba thymmai naduh ka 1 tarik Kyllalyngkot 2025, kaba la pynslem ia ka jingpyntreikam kaba la palat ia ka shi snem,” ong ka Kong Meri.

“Kane ka jingpynslem ka la wanrah ia ka jingsngewkhia bad ki jingeh ba khraw hapdeng ki nongtrei Muster Roll, ki nongtrei Casual bad ki nongbylla sngi jong ka thaiñ Rilum Jaiñtia bad ha kylleng ka jylla, khamtam haba shim ia ka jingkiew dor  jong ki mar ki mata. Kane ka jingpynslem ka pynduh noh ia ki hok kiba ngi dei ban ioh ha ka por kaba biang bad kaba la ktah ia ka jinglong jingim ia ka bha ka miat ka jong ngi,” ka la bynrap.