Dawa ithuh ka JSU ia ka Jowai kum ka ‘Summer Capital’

Syllad | The Rising MeghalayaMay 14, 2025

Ka Jaintia Students’ Union (JSU) haka 13 tarik Jymmang ka la dawa ba lada ka Tura kan ioh ia ka jingithuh kum ka ‘Winter Capital’ ne ka nongbah tlang ka jylla kumta ruh dei ban pynbna ia ka sor Jowai kum ka ‘Summer Capital’ ne ka Nongbah Lyiur jong ka Jylla Meghalaya.

“Ka Meghalaya ka dei ka jaka shong shnong jong ki lai kynhun ki jaidbynriew riewlum ba kongsan kiba kynthup ia ki Jaintia, ki Khasi bad ki Garo, kumta baroh ki dei ban ioh mar kat juh ka jingithuh khnang ba kan ym don ka jingnoh shiliang bad khnang ban pynneh ia ka suk ka sain ha ka jylla,” ong u kyrwoh lyngba u General Secretary ka seng u samla Neilkee Mukhim.

Ka JSU ka la pynpaw ruh ba ka thain Rilum Jaintia ka dang iai bteng ban mad ia ka jingeh bad jingsahdien ha ka liang ka roi ka par bad ha kaba iadei bad ki jingtei kam pynroi.

“Lada ka Jowai kan ioh ia kane ka kyrdan kum ka ‘Summer Capital’ ka Jylla, kane kan pynlong ia ka thain ba kan kiew ym tang ha ki kam pynroi kiba mar ia ryngkat hynrei kan pynthikna ruh ia ka jingmihkhmat kaba mar ia ryngkat hapdeng ki nongshong shnong,” bynrap u samla Mukhim.

Ka JSU ka maham ruh ba kano kano ka sienjam jong ka sorkar ban ai kyrdan nongbah jong ka aiom ia kawei ka thain da kaba kyntait ia ka Rilum Jaintia kane kan wanrah ia ka jingbym hun jong ki paidbah nongshong shnong.

“Lada ka don kane ka jingleh shiliang ne ka jingshah kyntait jong ka Rilum Jaintia, ka JSU ha ryngkat ki paidbah ka thain kim banse ban shim da ki sienjam ban pynlong da ki jingiakhih ban dawa ia ka hok halor.”