Dawa hiar shuki ka Congress ia u Dy CM halor ka jingkynnoh kyrshan pisa ka HNLC

Syllad | The Rising MeghalayaMay 9, 2025

Ka liang pyrshah Congress haka 8 tarik Jymmang ka la dawa hiar shuki ia u Symbud Myntri Rangbah ka Jylla u Bah Sniawbhalang Dhar katba ka jingtohkit ka dang iaid halor ka jingkynnoh ba dang shen jong ka seng kieng atiar ba la shah khein beain ka Hynniewtrep National Liberation Council (HNLC) ba u la aijingkyrshan pisa ia ka ha ka por ba u dang bat kum u Myntri ha ka sorkar barim ba la ialam da ka Congress.

Ka Meghalaya Pradesh Congress Committee (MPCC) ka la kyntait ba kam don jingtip ei ei ha kaba iadei bad kane ka jingdon bynta jong u Dhar bad kane ka kynhun kieng atiar.           

“Ka MPCC ka kyndit jur halor ki khubor kiba kynnoh ba u Sniawbhalang Dhar uba dei u dkhot barim ka Congress u donkti ha kaba aijingkyrshan pisa sha ka HNLC. Na ka liang ka party ka kyntait ba ka don kano kano ka jingtip ne don bynta ha kine ki jingkynnoh. Lada ka long kaba shisha, kine ki dei ki jingleh kam shimet jong u Dhar khlem ka jingtip ne jingmynjur jong ka,” ong u kyrwoh ka party.        

“Namar ka jingkhia jong kane ka jingkynnoh, ngi dawa ban pynlong mardor ia ka jingtohkit ka bym shah liang da ki bor ba dei khmih. Khnang ban pynthikna ba ka jingtohkit kan long kaba khuid ba suba bad ban ym ailad ia ki jingtuklar sain pyrthei, ngi khot dawa ia u Dhar ba un hiar shuki mardor tad hadien ka jingmih na ka jingtohkit,” dawa ka MPCC.

Nalor kata ka party Congress ka la ong ba ka ieng skhem halor ka nongrim kaba shai, ka jingbishar hok bad ka jingsynshar jong ka ain. Ngi pynrem jur ia kino kino ki jingiadei bad kino kino ki kam beain ne ki kam pyrshah ri.            

Shuh shuh ka party ka kular ban ai ka jingiatreilang kaba pura bad ki bor sorkar bad ka shaniah ba ka jingbishar hok kan treikam mardor lyngba ki lynti jong ka ain.