Dang iakren ka Jylla bad ka Sorkar Pdeng ban pyntreikam noh ia ka ILP bad plie lad ia ka lynti rel ha Khasi-Jaintia: CM

Syllad | The Rising MeghalayaJanuary 16, 2025

U Myntri Rangbah ka Jylla u Conrad K Sangma ha ka 15 tarik Kyllalyngkot u la ong ba ka sorkar Jylla ka dang bteng ban buddien bad ka Sorkar Pdeng na ka bynta ban pyntreikam noh ia ka Inner Line Permit (ILP) namar kane kan weng ia kiba bun ki jingeh bad plie lynti ia ka jingwan ka lynti rel ha Rilum Khasi bad Jaintia.

Haba jubab ia ka jingkylli halor kane ka bynta, u Conrad u la ong, “Hooid, ka long kaba shisha bad ngi dang iakren ia kane (Lada ka Meghalaya ka ioh ia ka ILP, kan lah ban weng ia ki jingeh kiba iadei bad ka lynrel rel) bad dei na kata ka daw ngi la mynjur ia ka Resolution halor ka ILP. Dei tang ka sorkar jong ngi kaba mynjur ia ka Resolution hapoh ka iingdorbar thaw ain bad kane ka dei ka khubor kaba khlain halor kane ka jingdawa kaba la iaid bun snem mynta.”

Watla katta u la iai ban ba ka bor ban mynjur ia ka ILP ka shong ha ka sorkar Pdeng bad ong, “Namar kata na ka bynta jong ngi ban ong ba kan sa urlong ka long kaba eh bha, ngi lah ban bteng ban tynruh ha ka kyrdan ka Sorkar Pdeng, hynrei ka dei kaei kaei kaba ngam lah satia ban ai ia ka jingkular halor kane.”

Da kaba shim ia ka jingong ba ka jingpyntreikam ia ka ILP ka lah ban plie lynti  ia ka jingwan ka lyni trel kum kaba treikam, u CM u la ong, “Ka mat jong phi ka long kaba shongnia hynrei ka dei kata ka mat kaba ngi dang iai bteng ban iakren bad ka sorkar India bad lada ngi lah ban shim ia kane ka sienjam kan plie lynti ia kiba bun ki mat ban lah ban pynbeit bad ka dei ban aijingmynjur, bad dei na kata ka daw ba ngi la mynjur ia ka resolution.”

Pynbeit thymmai ka Sorkar ia ka Investment Act ban pynthikna ban ym iaid lait ia ka LTA ha ki jingseng kam ha ka Jylla

Haba pynpaw ia kane, u Conrad u la iai ban ba ka sorkar kan pynthikna ba ka jingpyntreikam ia ka ILP kan ym ktah satia ia ka kam jngohkai pyrthei ha ka jylla.

“Hynrei ha kajuh ka por ngi hap ruh ban peit ia ka jingktah ia ka ioh ka kot baroh kawei bad ban peit ia ki mat baroh kiba don bad wad ia ki lad ki lynti ha kaba watla kane ka ILP ka lah ban wan bad ka lada ka sorkar India kan ai ia ngi, . ngi dei ban pynthikna ba kan ym ktah ïa ka jingwan ki nongwan shangkai pyrthei jong ngi, kan ym ktah ia ka ioh ka kot jong ngi bad ki riew paidbah kiba ka jingim jong ki ka shong ha ka kam jngohkai pyrthei mynta kin ym shah ktah ha kano kano ka rukom,” u la ong.

Nalor kata u Myntri Rangbah u pyntip ba un sa iakynduh ia u Myntri ka Tnad railway ha New Delhi ha ka 17 tarik Kyllalyngkot ban iakren halor ka jingiaid jong ka jingtyrwa ia ka lynti rel ha Ri-lum Khasi.

Ka project lynti rel ha Rilum Khasi ka la iakynduh jingeh namar ka jingpyrshang kaba jur na ki kynhun bapher bapher kaba kynthup ia ki kynhun sengbhalang namar ka jingsyier ia ka jingwan rung kyrthep ki mynder. Kiba bun na kine ki la dawa na ka sorkar ba ka dei ban pyntreikam shwa ia ka ILP hashwa ban iakren ia ki project lynti rel hapoh ka thain.

Rai ka sorkar Jylla ban kynthup noh ia ka ktien Pnar ha ka State Anthem

Halor kane ka mat, u Conrad u la ong, “Ngi la iai kren sha ki lad pathai khubor bad ha ki rynsan bapher bapher ba kano kano ka rai kaba ngin shim kan long ha ryngkat ka jingkyrshan jong ki paidbah ka thain bad ka jylla bad ki seng bapher bapher bad ngin pyrshang katba lah ban pynbeit ia kine ki mat bad tad hadien kata ngin sa jam shakhmat bad ka kam lynti rel ha ka thain.”