Dang bishar bniah ka sorkar ban pynkhlain ia ka MRSSA ne wanrah da ka ain thymmai: Paul

Syllad | The Rising MeghalayaJuly 10, 2025

Ka Sorkar Jylla ka dang bishar bniah ia ki lad ki lynti la kan nangpynkhlain shuh shuh ia ka Meghalaya Residents, Safety and Security Act (MRSSA), 2016 lane ban wanrah da kawei pat ka ain thymmai ban pynthikna ia ka jingshngain jong ki nongleit nongwan ha Meghalaya da kaba buh hakhmat ia ki jingkylla ha ka jinglong jingman bad ka jingnang jur ka jingwan rung beain jong ki briew napoh Bangladesh.

U Nongaiktien ka sorkar MDA uba dei ruh u Myntri Sorkar, u Bah Paul Lyngdoh haba kren sha ki lad pathai khubor ha ka 9 tarik Naitung u la ong ba ia kane ka kam la iakren ha ka jingialang ba la pyniaid da u Symbud Myntri Rangbah ka Jylla u ba khmih ia ki kam Pohiing (Poice) u Bah Prestone Tynsong dang ha kine ki lai sngi bala dep.

“Ngi la iakren ruh halor ki sienjam bad ki lad ki lynti ba la ngin pynkylla ia ka MRSSA lane ban wanrah da kawei pat ka ain kaba thymmai ka ban pynleit jingmut pura halor ka mat kaba iadei bad ka jingshngain jong ki nongleit nongwan ha Meghalaya bad da kaba buh hakhmat ia ki jingkylla ha ka jinglong jingman, ka jinglong jingman jong ka sain pyrthei, ka jingnangkiew ki kam wan rung beain jong ki briew na Bangladesh bad ka jingmih ki kynhun Islamic kiba pyrshah India ha katei ka ri.Kin baroh ki long ki bynta kiba ngi sngewkhia ki ban aijingtip ha ka jingialeh ka jong ki ban pynkhlain shuh shuh ia ka MRSSA lane ban wanrah da ka ain thymmai,” ong u Bah Paul.

Ha kaba iadei bad ka MRSSA, une u Myntri u pyntip ba ki don artylli ki jingkylli ba la buh hakhmat da u Lat ka Jylla bad na ka liang ka sorkar ka la rai ban sa ai shen ia ka jubab.

“Kine ki artylli ki jingkylli ki dei kiba don jingiadei la ka jingpynieng ia ki facilitation centre kan ktah ia ka jingiaid jong ki kali, la kan lam sha ka jiingshah pyndik jong ki nongleit nongwan, bad ka don ruh khyndiat ka bynta jong ka MRSSA kaba kdew halor ki kam runar, kumta kaei ka jingbatai shaphang kita ki kam runar,” bynap u Bah Paul.