Dang ap ka Shillong Engineering College ia ka jingmynjur ka AICTE ban ioh sdang klas

Syllad | The Rising MeghalayaSeptember 2, 2024

Ka Shillong Government College of Engineering kaba don ha Mawlai Kynton Massar, Shillong mynta ka dang ap ban ioh ia ka jingmynjur jong ka AICTE na ka bynta ban ioh sdang noh ia ka jingshim klas.

Ka Academic Council jong ka NEHU kala ai ia ka jingpyniasoh na ka bynta ka jinghikai ha ka B.Tech course, ong ka tyllong khubor sorkar.

Khnang ban pynlong ia kane ka Engineering College ba kan lah ban treikam pura, na ka liang ka sorkar ka la pynsngew ia ka jingmynjur ban ailad ia u Additional Director & Principal ka Shillong Polytechnic, Mawlai bad 13 ngut ki nonghikai kiba la biang kyrdan ban bat ruh ia ka kam kum ki Head jong ka Institute ban long kum ki nonghikai jong kane ka Engineering College, ki la ong.

Ka jingtei ia ka Academic Block, kata ki hostel na ka bynta ki shynrang bad kynthei ki dei kiba la lah ban pyndep bad ia kiba la plie paidbah ruh da u Myntri Rangbah ka Jylla ha ka 1 tarik u Kyllalyngkot 2023.

Kumjuh ka jingshna ia ki surok hapoh ka campus bad ki jingpynitynnad ia ka jaka nalor ka jingpynbiang ia ka bording bad ka um hapoh ka campus jong ka Shillong Government College of Engineering la lah ban pyndep.

Na ka liang ka sorkar Jylla ka la pynmih ruh 55 tylli ki kam hikai bad kiwei pat ki nongtrei na ka bynta kane ka College.