Dang ap ka Jylla ia ka jingai jingbit ka Coal Ministry ban ioh sdang tih dewiong da ka juk saian: CM

Syllad | The Rising MeghalayaJanuary 16, 2025

Ka sorkar jylla ka dang ap ia ka jingai jingbit jong ka Coal Ministry ban plie ia ki par dewiong na ka bynta ban sdang ia ka jingtih dewiong katkum ka jingstad saian hapoh ka jylla Meghalaya.

Haba pyntip ia kane ha ka 15 tarik Kyllalyngkot, u Myntri Rangbah ka Jylla u Conrad K Sangma u la ong ba ka jingpynlong ia ka jingpynsngew paidbah ne ‘Public Hearing’ na ka bynta kane ka kam tih dewiong da ka juk stad kaba mynta ha ki laitylli ki jaka la dep ban pynlong naduh kine ki ar bnai ba la dep.

“Hadien kane ia ki kot ki sla (file) la phah biang sha ka tnad Forest bad ka Pollution Board ban ioh ia ka jingbit bad mynta kitei ki file ki la poi sha Delhi,” u la ong da kaba bynrap, “Mynta ka Coal Ministry ha Delhi kan sa shim ia ka rai kaba khatduh ban ai ia ka jingmynjur, kata hadien ba la khmih ia baroh ki jingai jingmynjur ba la ai da ki tnad bapher bapher ka sorkar pdeng bad sorkar jylla. Mynta ka jingai ia ka rai kaba khatduh ka dei ha ka Coal Ministry na ka bynta ban ioh jingbit ban plie ia ki par dewiong, bad kane ka jingai jingbit kan long hadien ba ka Coal Ministry ka la bishar bniah ia baroh ki bynta.”

Haba pynskhem ia ka jingdonkam ban sngewthuh ia ka jingeh ban weng shisha ia ka jingkhang jong ka NGT, u Sangma u la ong, “Ka long ka rukom treikam kaba jyrwit jyrwat bad kaba eh bha kaba ngi hap ban bud. Ym tang ka jingshisha ba ngi hap ban iakhun bad ki tnad bapher bapher ha kaba iadei bad ka NGT, kiwei pat ha ka Supreme Court kaba sa shisien ka la long kaba eh bha kaba ngi la jop shisha bad ngi la lah ban weng noh ïia ka jingkhang.”

Dang iakren ka Jylla bad ka Sorkar Pdeng ban pyntreikam noh ia ka ILP bad plie lad ia ka lynti rel ha Khasi-Jaintia: CM

Ha kaba iadei bad ka jingsngewkhia jong ki liang pyrshah halor ka jingpynslem ia kane ka kam,” u Myntri Rangbah u la ong, “Ki la don katto katne ki jingsngewkhia kiba la pynpaw da ki riew shimet halor kane ka jingpynslem, hynrei kine ki dei ki bynta kiba shem jingeh shibun ia kiba donkam ban shimkhia ha ki kyrdan bapher bapher, la ka dei bad ka sorkar India, NGT, Supreme Court, Coal India, ngi la hap ban iakren bad kiba bun ki kynhun. Kumta ban shu peit na bar ka long kaba suk bha ban ong, kaei kaba la jia, balei ki kam kim shym la iaid sted, hynrei ka long kaba kyllain bha bad shisien ba ngi la pyndep ia kiei kiei baroh bad shisien ba ngi la pynmih ia ki jingtip kiba bniah halor kaei kaba la jia, nga thikna ba ki paidbah kin iaroh ia ka kam kaba ngi la leh ban pynurlong ia kane ka kam.”