Dang ap jubab ka Sorkar na ka Defence Ministry halor ka jaka ban pynkynriah ia ki Harijan

Syllad | The Rising MeghalayaApril 30, 2025

U Symbud Myntri Rangbah ka Jylla uba khmih ia ka tnad Kam Pohiing, u Bah Prestone Tynsong ha ka 29 tarik Iaiong u la pyntip ba ka Sorkar Jylla ka dang ap ia ka jubab na ka Defence Ministry halor ka jingkyrpad ban ai ia ka jaka na ka bynta ban pynkynriah ia ki 342 tylli ki longiing Harijan na Them Metor, Iew Mawlong.

Haba kren sha ki lad pathai khubor, u Bah Prestone u la ong ba ka jingialang kaba u la khot pynlong ha kaba iadei bad kane ka mat kam shym la long kaba seisoh. “Ia mynta hi ka jingialang kam shym la long kaba seisoh, kumta ngam lah ban batai palat.”

Haba kylli, u Bah Prestone u pyntip ba ka jingialang ka la iakren ruh halor ka jingkyrpad jong ka sorkar jylla ban ai ia ka jaka ka bym pyndonkam jong ka tnad Defence khnang ban lah ban pynkynriah noh ia kine ki longiing Harijan. Kumta na ka liang ka sorkar ka dang ap ia ka jubab na ka tnad Defence halor kane ka phang.

“Hooid, ka jingshisha hi ka long ba ngi la iakren halor kane ka mat bad mynta ngi dang ap ia ka jingai jingtip na ka Sorkar India lyngba ka tnad Defence Ministry namar ia ka shithi la dep ban phah sha ka Defence Ministry bad ngim pat shym la ioh satia ia kano kano ka jingtip na ki, bad ha ka jingshisha ngi la kyrpad ia ka Sorkar India lyngba ka Defence Ministry lada ki lah ban ai ia ngi ia ka jaka ka bym shym la pyndonkam. Nga tharai kam don satia kaba kum kata,” u la ong.

“Ia mynta hi u Commissioner and Secretary ka tnad Urban Affairs u la buddien halor kane ka kam bad ka Defence Ministry bad kyrmen skhem ba ngin sa ioh shen ia ka ingtip na ki,” bynrap u bah Prestone.