Da u Sdai chah pom u Waheh Chnong Tuber Kmaichnong deilang wow secretary IVCS

Syllad | The Rising MeghalayaJanuary 9, 2024

Ka khubor wa sniawma sniawtien da jia ko ha Tuber Kmaichnong, East Jaintia Hills heiwa ha ka 3 tarik Duiatra ar ngut ki bru da chah pom ki da u sdai katwa dang yaleh ki wow khanglad yei awri awra wamih hapoh ka chnong Tuber Kmaichnong.

Kini ki ar ngut wa da chah pom toh u Micky Lyngdoh, Waheh Chnong Tuber Kmaichnong wa u Denis Lyngdoh, Secretary IVCS waman leh u Chairman iong ka Tuber Kmaichnong

Kat kam I mudui wa da booh ha Ladrymbai Police Outpost ha ka sngi wabood 4 tarik Duiatra da u Chelang Lyngdoh u paiu iong u Waheh Chnong Tuber Kmaichnong, da ong wa ini da jia I hei por 11.30 I miet katwa kini ki arngut ki waheh dang yaleh ki u khanglad yei awri awra wamih hei thaw watip kam I Kamar Khot wahap hapoh u pud u ang ka Tuber Kmaichnong.

Syndet heitae I por da mih u Training Phawa na ka kari Hyundai Creta ronglieh wa em iow Registration Number ML-10-C-5037 deilang wow sdai ha kti wei da dat u ya u Micky Lyndoh wow Denis Lyngdoh kat hadooh wa da takha da mynsoo wei wiar iongbru ki waroh ar ngut.

Chooh chooh u Chelang da kynnoh u leh wa ini I leh u Training Phawa toh iwa da em I thmu sih iong-o ya kini ki arngut ki waheh nongkitkam ka chnong Tuber Kmaichnong.

Hadien ini I jia ya kini ki arngut da pynkit cha Civil Hospital Ialong tangwa du kattu katni por da kit ya ki cha Super Care Hospital Shillong neibynta wow ioh ki I sumar wa rap paka.