Da pyndep ya ka lehniam Ku Tyngkong u Pator Raymond Nartiang ha Raij Tuber

Syllad | The Rising MeghalayaJanuary 9, 2024

U Pator Raymond Nartiang ka Raij Jwai hadien I pyndep iong-o ya ka lehniam Ku Tyngkong ha Raij U Kongwasan Chyrmang ha kani wan ka taiaw iong ka sngi Muchai 9 tarik Duiatra da iohlad u wow pyndep sa ya ka lehniam Ku Tyngkong iong-o ha Raij Tuber, East Jaintia Hills District.

Kani ka rukom lehniam man ko chibynta ka rukom dustur watoh u leh u pyndep chisien chipatein Pator kynthup ha ka Raij u Langdoh Jwai, Raij u Langdoh Kongwasan Chyrmang, Raij u Langdoh Tuber wa ha Raij u Langdoh Ialong.

Ya kani ka lehniam Ku Tyngkong u Pator ha Raij u Langdoh Tuber da sakhilang da u Pa Dolloi ka Elaka Jwai Waheh Puramon Kynjing chirrup ki chakri niam ka Raij Jwai, Raij Chyrmang, Raij Ialong wa Raij Tuber nalor ki waheh wasian ka Seinraij Jwai wa kynthup iow OHToi, President Seinraij Jwai wa kiwi kiwi.

Ha kani ka sngi ki khon ka Raij Tuber dei kmen I ka-it yeini I wan yuhkjat u Pator ha ka nongrim iong ka lehniam Ku Tyngkong da pdiang sniawbha ki ya o dei wa yang nadooh le lad wow lai cha Yung Langdoh wa em ha Tuber Kmaichnong deilang I kbai I kyriaw iow tip ki khon ka Raij ka chnong u yawanlang wanbi cha Yung Langdoh.

Ka bynta wa bood iong ka lehniam ha kani ka sngi toh I yalai hei thaw wa em u Moo Pator neibynta wow man I ngooh I dem wei pynap blai pynap syiem deilang I suit I choor wei  daioh leh I klam na u Dolloi u Pator wa na  u Tymmen Raij ka Raij Tuber Woh Kiang Phawa.

Khatdooh da pynkut ya ka lehniam Ku Tyngkong ha Yung Langdoh dei wa em I pynsait kjat ya u Pator da ka Langdoh chwa wow psiah chapoh Yung pynbood wan I ngoohblai ngoohsyiem deilang I suit I chor wa da chimbyntalang da ki Soo Langdoh chirup ki chakri niam iong ki Soo Raij, ka yutang yubat hapyrdi u Langdoh Tuber wa u Pator Raij Jwai  wei pynkut wan da ki kyntien snein kyntien kroo na u Pa Dolloi ka Elaka Jwai kam u khlieh ka niam khlieh ka Elaka.