Da ki mar bam synniang u Nehemayah bad ki paralok sha ki khunswet ka NEIMA Sahsniang

Syllad | The Rising MeghalayaApril 5, 2020

U ma Nehemayah Tyngkan u wei naki riew rangbah jongka thain ha ryngkat bad ki paralok jong u, u Romes Dkhar, N.Suiam bad u R. Parien daka mynsiem jongka jingiatip lem bad snewkhia haka sngi Saitjain kila hiar sha NEIMA Sahsniang, ka jaka ri iaki khunswet khun rangli ban leit kner lem iaki kti jingiarap kat ba shah ei ka bor naka bynta kine ki paradoh ki parasnam kiba don ha kane ka jaka.

U ma Nehemayah Tyngkan,  haba iakren u la ong ”Nyngkong eh kaba pynlong ia nga bad ki paralok ban ialeit synniang lem sha kine ki khunswet ka long hadien baka Sorkar Kmie kala pynbna iaka Lockdown kaba 21 sngi kynthih namar ka jingialeh pyrshah iaka jingpur u khniang jingpang COVID-19, bad sa kawei ruh ngi tip shai ba ki nongpyniaid kane ka jaka ki ia kynduh shibun ki jingeh ha kaban wad iaki lad ki lynti kumno ban pyndap pynbiang ia kine ki khynnah naduh ka bam ka dih bad kiwei kiwei ki jingdonkam ba manka sngi ka jongki”

Shuh shuh u la bynrap ruh ba kane kam dei ka sien kaba nyngkong ia u ban pyrshang lem hala i bor iba rit tam, hynrei wat lada ma u bad ki paralok kim dei satia kiba bit ba biang haka ioh ka kot, hynrei la katta ruh hala i bor iba rit tam kim lehrain bad kin mih shakhmat ban ia snohkti lang ban synniang da ki marbam sha katei jaka ri khynnah.

U Nehemayah Tyngkan bad ki paralok kum ki riew paidbah ki pynpaw iaka jingsngewkhia haduh katta katta namar ka jingduna palat ki lad jingiarap na kaliang ka Sorkar Jylla. Haka jingshisha Ka Sorkar kala dei ban phaikhmat kyrpang sha kum kine ki jaka namar kadei ka kam kaba kyntang ban ri ban sumar iaki para mynsiem ba kordor haka jingim jong ngi kum ki Briew.

Khatduh khatwai u Ma Nehemayah Tyngkan u pynpaw iaka jingsngewnguh ia U Blei Trai Kynrad uba la btin lynti bad plie iaka lad ka lynti ha kaba sa shisien pat kila ioh ban iadon bynta lang bad kine ki paradoh ki para snam ha katei ka jaka ri khynnah, bad ki kyrmen skhem ba kiwei kiwei ki riew rangbah bad ki sengbhalang ruh kin dang iai bteng shuh shuh ban kner iaki kti jingiarap sha kane ka jaka khnang ba ki para mynsiem jongngi kiba don ha kane ka jaka kin iohlad ban longlem kumba long ma ngi baroh.

Ha kane ka jingai sngewbha da ki marbam sha ka NEIMA kine ki rang  kila 9 byrni u khaw, 1 byrni u phan, 1 synduk ak sabon, umphniang 2 litre bad ka pisa T.6500/-.