Da ki kali kit niut aiti u Kyrmen Shylla sha ka Khliehriat West bad Lad Rymbai

Syllad | The Rising MeghalayaMay 27, 2025

Shibynta ban kyrshan ban pynkhuid ia ki jaboh jabaiñ bad ban wanrah ia ka khuid ka suba, u Myntri sorkar uba dei ruh u MLA ka thain u Bah Kyrmen Shylla haka sngi Nyngkong u la aiti da ki kali kit niut ba la bei pisa na ka District Mineral Foundation (DMF) fund na ka bynta u snem mang tyngka 2024-2025 sha ka shnong Khliehriat West bad Lad Rymbai ha ki jingialang ba la long ha Community Hall Khliehriat  West  bad Community Hall Lad  Lad Rymbai Datsympein.

Haba kren ha ka jingialang, u Bah Kyrmen Shylla u la pan ia ka jingiatreilang na baroh ki nongshim bynta khamtam na ki nongialam shnong halor ka mat kaba iadei bad ka jingpynkhuid ia ki jaboh jabain ha kaba u la ban jur ruh ia ki bor shnong jong ka Khliehriat West ba kin pyndonkam hok ia kane ka kali kit niut na ka bynta ka jingshakri ia ka khuid ka suba ha sor Khliehriat.

U Myntri u la kren ruh halor ki kam pynroi bapher bapher ba la shim da ka sorkar ha East Jaintia Hills, ha kaba u la pyntip ruh ba ka sorkar ka la mynjur ia ka projek na ka bynta ban shna ia ka surok kaba pyniasoh ia ki jaka jong ki San Shnong ka East Jaintia Hills sha Shkentalang ha West Jaintia Hills ha ka jinglut ka ban kot T.125 klur bad ka ban kyntiew ia ka khaii pateng bad ki kam jngohkai pyrthei ha kane ka thain.

U Deputy Commissioner & Chairman ka DMF Trust East Jaintia Hills District, u Shivansh Awasthi, IAS ha ka jingkren u la pynpaw ka jingkyrmen ba da ka jingaiti ia kane ka kali kit niut kan iarap shibun ha kaba iadei abd ka mat ka jinglang jaboh ha Khliehriat khamtam ha ki jaka iew.

U la ong ruh ba ka ophis jong u ka dang wad ia ka jingmut ban pynmih katto katne ki jaka shna sboh kiba rit lyngba ka DMF lane lyngba ka MNREGA ha kaba ia ki jaboh ba sngem lah ban pyndonkam ban pynkylla sboh bad ia ki jaboh plastik yn lah ban lum bad phah sha ki karkhana cement ban bret ha ki jaka thang jong ki.

Kumjuh ha ka jingialang ha Lad Rymbai Datsympein la ia don lang u MLA ka thain u Bah Kyrmen Shylla, Deputy Commissioner, East Jaintia Hills u Shivansh Awasthi, IAS, Sub-Divisional Officer (SDO)-Sadar, East Jaintia Hills District, M. Kumar, IAS, Rymbai-Khliehriat MDC kong Violet Lyngdoh, ki nongialam shnong bad ki nongshong shnong ka thain Lad Rymbai.