Da ki jaka sait kti buh ka Red Cross, Bharat Scouts Guides & Pulit ha sor Jowai

Syllad | The Rising MeghalayaJune 13, 2020

Ka Indian Red Cross Society bad ka Meghalaya Bharat Scouts Guides, West Jaintia Hills District kum shibynta ban iatreilang bad ka sorkar ha ka ban iada na ka jingpur jong ka jingpang Covid-19 hapoh ka District ki la shim iaka sienjam ban shna bad buh ia ki jaka saitkti ne ‘Hand Washing Point’ ha kawei na ki bynta ka Iawmusiang ba don mar pyrshah bad ka iing treikam jong ka JHADC.

Ia kine ki jaka saitkti la plie paidbah mynta ka sngi 13 tarik da ka S Tariang, District Commissioner Guides, West Jaintia Hills bad u W.Lyngdoh, Chairman IRCS, West Jaintia Hills District ha ryngkat ka jingiadonlang ki Scouts Master, Guides Captain, Rovers bad Rangers.

Ha ka jingialang ba lyngkot shwa ban plie la ioh ka jingkren maitphang halor kane ka kam na u Ohiwot Laloo, District Secretary MBS&G kumjuh ruh ki kyntien ai mynsien na u W Lyngdoh bad ka S Tariang katba ha ka bynta ba kut u A.Bthuh, Jt. District Secretary MBS &G u ai ki kyntien khublei.

Ha kawei pat ka khubor na kaliang ka tnad Pulit jong ka West Jaintia Hills District Executive Force (WJHDEF) ruh kila buh ka jaka saitkti ha lad Kiang Nangbah Government College ne ha lynti ban leit sha Jowai Police Reserve.