Da ki badge iong deng ka MMSA ba shah pyniap dusmon ka doktor ha Kolkata

Syllad | The Rising MeghalayaAugust 17, 2024

Ka Meghalaya Medical Services Association (MMSA) shibynta ban iasnohkti lang bad ka All India Federation of Government Doctors Association (AIFGDA) haka 16 tarik ka la pynlong da ka jingdeng ia ki badge iong kum ka dak ban pynpaw pyrshah jur halor ka jingjia shah leh beijot bad shah pyniap dusmon ba dang shen jong kawei ka doktor ha Kolkata.

Lyngba u kyrwoh ka MMSA ka la ong ba kane ka jingdeng da ki badge iong ka pynpaw halor ka jingieng iatylli lang bad baroh ki para doktor ha ka ri baroh kawei ban pynrem jur ia kane ka kam bymman bad ban dawa ban pynioh mardor ia ka jingbishar kaba hok.

Nalor kata ka la bynrap ruh da kaba ong, “Ka jingshngain bad ki lad jingiada na ka bynta ki doktor jong ngi ka long kaba kongsan, bad kiba kum kine ki jingjia kim dei ban shu kut khlem da shim ia kino kino ki sienjam.”

Ha kajuh ka por ka MMSA ka kyntu jur ia ki bor Sorkar ba kin shim ia ki lad jingpynshitom kiba tyngeh pyrshah ia ki riew pyntriem kiba donkti bad ban pynthikna ruh na ka bynta ka jingshngain jong ki doktor ha ka trei ka ktah ka jong ki.

Ki dkhot ka MMSA kin bteng ban ai jingshakri hakaliang ka koit ka khiah ha baroh ki jaka sumar ha Jylla.