Da ka Yoga Camp ba lai sngi yn bteng ka Ramakrishna Mission ha Shillong

Syllad | The Rising MeghalayaJune 22, 2025

Ban bteng iaka jingrakhe iaka International Day of Yoga 2025, ka Ramakrishna Mission, Shillong kala pynbna ba kan pynlong ia ka Yoga Camp kaba lai sngi ha Ramakrishna Mission Vivekananda Cultural Centre, Quinton Road, Police Bazar, naduh ka 22 haduh ka 24 tarik u Jylliew.

Kane ka camp ba lai sngi kan long naduh ka por 4:00 haduh 5:30 man ka janmiet. Kane ka camp ka long khlem jingsiew bad la plie paidbah ia baroh, bad la khot sngewbha ïa baroh ban iashim bynta ban mad ïa ka bor pynkylla dur jong ka yoga.

Haba rakhe iaka International Day of Yoga haka 21 tarik Jylliew, ka Ramakrishna Mission ha ka jingïatreilang bad ka Central Bureau of Communication (CBC), Shillong, ka la pynlong da ka Yoga Session kaba kyrpang ha phyllaw jong ka Mission ha Laitumkhrah. La ïalam ïa ka yoga da u nonghikai jong ka Meghalaya Yog Samiti da ka Common Yoga Protocol ba la bthah da ka Tnad AYUSH. Ki paidbah na ki liang bapher kum ki samla pule, ki nonghikai, ki kmie ki kpa, ki dkhot ka NCC, ki nongtrei ka CBC bad Ramakrishna Mission ki la ïashim bynta shitrhem ha kane ka jingialang.

La plie ïa ka jingïalang da u Swami Hitakamananda ji Maharaj, Secretary ka Ramakrishna Mission Shillong, ryngkat ka jingïadonlang u Swami Vedeshananda Maharaj bad u Swami Divyaswarupananda Maharaj.

U Swami Vedeshananda Maharaj, haba kren iaka jingsdang ka yoga hyndai bad ka jingkordor jong ka yoga ha ka pyrthei baroh kawei. U la ban jur ba ka yoga ka dei ka jingstad science kaba pynbha ia ka met, ka jingmut jingpyrkhat bad ka jingring mynsiem, kaba ialam ia u nongleh sha ka jingpyniasoh ia ka jinglong shimet bad ka jinglong ba kyllum.

U Swami Vedeshananda u la pynpaw ruh ïa ka jingthmu kaba don ha lyndet jong ka International Yoga Day, kaba la tyrwa da u Myntri Rangbahduh ka ri u Narendra Modi ha u snem 2014 bad kaba la kyrshan da 175 tylli ki ri. U la pynkynmaw biang ba ka yoga kam khein ia ka jinglong niam ne kolshor, ka shakri kum ka lynti sha ka bha ka miat jong ka pyrthei baroh kawei, ka jingsuk hapoh, bad ka jingkoit jingkhiah ha ka met. U la kyntu ia baroh ban pdiang ia ka yoga khlem da khein ia ka rta ne ka tynrai, da kaba ban jur ia ka jingdonkam jong ki rukom pynhiar mynsiem bad ka rukom ieng kaba biang ha kaba ioh ia baroh ki jingmyntoi jong ka jingleh yoga.

U Swami Vedeshananda ji Maharaj u la pynleit jingmut ruh halor ka phang pdeng jong ka International Day of Yoga kaba 11 – “Ka Yoga na ka bynta kawei ka Pyrthei, kawei ka Koit ka Khiah.” U la batai ba kane ka phang ka pynpaw ïa ka bynta ba kongsan jong ka yoga ha kaba kyntiew ïa ka jingïatylli ym tang ha ki briew, hynrei wat bad ka mariang bad ka imlang sahlang baroh kawei. Ka yoga kaba la seng tynrai ha ka jingstad hyndai, ka kyntiew ia ka jingim kaba neh da kaba pynshlur ia ka jinglong kaba ryntih, ka jingpyrkhat kaba jylliew, bad ka bha ka miat kaba pura.

U Swami Hitakamananda Maharaj u la ong ba ka yoga ka dei ka jingai sngewbha ba shirta jong ka India sha ki briew- kaba ai ka lad ban ioh ia ka jingkhlain ka met, ka jingshai jong ka jingmut jingpyrkhat, bad ka jingroi ba kynja mynsiem. U la pynshlur ruh ban leh yoga man ka por ban pynneh ia ka jingiatylli hapdeng ki jingeh jong ka jingim mynta.

La pynlong ïa ka jingkylli kaba lyngkot halor ka International Day of Yoga (IDY) ban tynjuh ïa ka jingtip jong ki nongïashim bynta shaphang ka histori jong ka, ka jingktah ha ka pyrthei, bad ki phang pdeng ba man la u snem. Ka quiz ka la long kaba bun ki nongiashim bynta, bad la pynkup burom ia ki ki nongjop da ki khusnam bad ki syrnot, kaba la wanrah ia ka jingpynkut kaba sngewtynnad bha ia kane ka jingïalang.