Da ka tamasa Na Thymmei yn kyntiew ka Seng Khasi Kmie iala ka jong ka lariti

Syllad | The Rising MeghalayaOctober 16, 2024

Ka Seng Khasi Kmie, Mawkhar, Shillong ka wan ban pyntip  ba kan pynlong biang ïa tamasa “Na Thymmei Festival”,  kaba dei artad ka sien kaba lai, kaba la ïarap ban kyrshan pisa ia ka da ka tnat Tourism jong ka sorkar jylla.

Haba kren sha ki lad pathai khubor ha ka 15 tarik u Risaw 2024,ha Shillong Press Club, ka kynhun jong ka Seng Khasi Kmie kaba kynthup ia u Rgh Daw-o-hi Suiam, u Rgh Hamar Singh Kharhmar, u Ehsing Khiewtam bad ka nongjop ne ka lahduh ka iakop Lukhimai u snem uba la dep ka samla Ema Buhphang, ki la wan ban ia kyndun ïa ki lad pathai khubor, ban ai ïa ka jingpynshai bad ruh ban batai shaphang kane ka tamasa kaba  la buh ba kan long ha ka 26 bad ka 27 tarik u Risaw 2024, ha madan Weiking, Jaiaw, Shillong.

Ka jingthmu ha lyndet ka jingpynlong ïa kane ka tamasa ka long ban  kyntiew ïa la ka jong ka la-riti ne ka kolshor khnang ban lah ban pynpaw pat sha ka pyrthei ïa ka jingriewspah ka jong ka kaban khring ruh ïa ki nongwan jngoh kai pyrthei bad kaba kongsan lei lei ka long  ka jingïadei  hapdeng u pid ka bri Hynñiewtrep U Hynñiewskum.

Mynta ka kynti, kane ka tamasa  kan don biang ka jingpynïakop  pyni riam tynrai katta “Ka Lukhimai bad Nai Khatsaw Synnia, khlem da klet ïa ka rwai ka siaw ka tem ka put tynrai, ha kaba ka jingwan ban ïashim bynta kan nym kut tang nangne na Sor Shillong hynrei na kylleng sawdong ka bri Hynñiewtrep u  Hynñiewskum.

Shuh shuh ha kane ka kynti, kin don ruh ki kynhun ba dei napoh Ri Lum Garo bad ruh  na Mizoram kiban wan  ban ai ïa la ki jingshad tynrai ryngkat ka jingpynsngew ruh ïa ka jingmut  jong ki jingshad ki jong ki.

Ha kine ki arsngi jong kane ka tamasa kin don ruh ki basa die jingbam tynrai bapher bapher.