Da ka “Sierlapalang Operation” pynbna ka HYC ban sdang kyndang ia ki mynder ri

Syllad | The Rising MeghalayaMay 11, 2025

Ka Hynniewtrep Youth Council (HYC) haka 10 tarik Jymmang ka la shim ia ka rai ban sdang noh ia ka “Sierlapalang Operation” pyrshah ia ki mynder ri kiba wan rung bean sha ka jylla Meghalaya. 

Haba kren sha ki lad pathai khubor hadien ka jingialang CEC, u President ka HYC u Samla Roykupar Synrem u la ong, “Ngi la rai ban sdang noh ia ka “Sierlapalang Operation” pyrshah ia ki mynder ri kiba wan rung beain kiba wan ban wad kam wad jam ha kane ka jylla.”

“Kane ka operation ka long ban thwet bad ban lapdien ia ki mynder kiba shong ba sah ha Meghalaya khlem ki kot ki sla kiba biang bad ka registration. Ka Meghalaya ka la dep ban pyntreikam ia ka ain Meghalaya Identification, Registration, Safety and Security of Migrant Workers Act, 2020. Katkum kane ka ain, man ki nongtrei bar jylla ki dei ban register hapoh kane ka ain. Ngi kwah ban pynthikna ba baroh ki nongtrei bar jylla ki dei ban register ialade bad lada lap ia ki bym register bad bud ryntih ia ki kyndon jong ka ain, ki dkhot ka seng kin leh ia kaba donkam katkum ka iain,” u la ong.

U la ong ruh ba ym lah satia ban len halor ki jingshisha ba ka jinglong jingman hapdeng ka India bad ka Pakistan, ki la don ki khubor halor ka jingwan rung beain jong ki mynder ri hapoh kane ka jylla.

Katkum ka kaiphod na ki heh BSF ki la ioh ban kem ia bun ngut ki nongwan rungtuh.

“Wat ki dkhot jong ngi na ki thain khappud ka Bangladesh ruh ki la ioh ban bat ia bun ngut ki nongwan rungtuh ia kiba la aiti noh sha ki bor pulit. Lada ym lah ban tehlakam ia ka jingwan rungtuh ki briew napoh Bangladesh ka jingshngain jong ka jylla kan sa shah ktah kumjuh ka ri baroh kawei,” ong u samla Roykupar.

“Kumta ruh ngi la bthah ia baroh ki unit bad ki dkhot ha ki jaka kiba don ha ki thain khappud bad ka Bangladesh ba kin long kiba peitngor bad lada ki i shan khmat ia ki briew ki dei ban bat ia ki bad ban aiti sha ki bor pulit na ka bynta ban pynshisha bad ban leh ia kaba donkam. Ngi kyntu ruh ia ka tnad pulit ba kan shim kongsan ban pynshisha haba don ki briew kiba artatien kiba shah kem na ki than khappud,” u la bynrap.

Haba pynpaw ba ka jingwan rung beain kam shym la jia tang ha ki jaka khappud bad ka Bangladesh, une u nongialam ka seng u la ong ba katkum ka kaiphod ba la ioh lum ki don ki briew kiba la shah kem na Delhi, Chennai bad na kiwei kiwei pat ki jylla ha kaba kawei na ki lynti kaba kine ki briew ki iaid lyngba ka dei na Meghalaya.