Da ka rally ki thuk thuk pynlong ka ophis DSWO Jowai ban ialap pyrshah drok

Syllad | The Rising MeghalayaJune 15, 2025

Ka ophis District Social Welfare Officer, Jowai haka sngi Saitjain ka la pynlong ia ka jingiaid rally da ki thuk thuk hapoh ka ‘Nasha Mukt Bharat Abhiyan’ ban pynshai paidbah halor ka jingshyrkhei jong u drok.

Ia kane ka rally la sdang da ka jingkaweh lama da u Additional SP u I. Gupta IPS na  District Library Mynthong, Jowai ba iaid lyngba ia ki jaka jong ka sor Jowai bad pynkut ha Wahiarong, Mihmyntdu lyngba ka jingpynphriang ia ka khubor jong ka imlang sahlang kaba lait na u drok.

Ha ka jingkren une u heh pulit u la ban jur ba ka jingpyndonkam drok ka buh ka jingma kaba khraw ia ki nongpyndonkam kumjuh ia ka imlang ka sahlang. Haba batai kum ka jingeh ba la sakhi ha ka pyrthei baroh kawei, u la kdew ba katba ki tnad sorkar bapher bapher kumjuh ki kynhun seng ki la shim ia la ki jong ki bynta ban iakhun pyrshah ia kane ka jingeh, u la ong ba ka long ruh kaba kongsan kumjuh ia ka imlang ka sahlang ba kin mih shakhmat ban long ki nongrah khubor na ka bynta ka jingkylla.

Ka Jylla Meghalaya khamtam ka Rilum Jaintia ka dei kaba la kyrkhu kyrdoh da ka mariang bad ka jingsuk, ka jingitynnad bad ka jingriewspah ha ka kolshor kaba hiar pateng. Ki nongshong shnong kane ka thain ki dei ban lehkmen halor kine ki jingkyrkhu da kaba pdiang ia ki rukom im kaba khuid ba suba bad kaba koit ba khiah kiba don tynrai ha ka riti ka dustur – ym lyngba ka jingpyndonkam ia ki jingdih kiba sniew. U la khot ruh ia baroh ki nongshong shnong ban iada ia ka bha ka miat bad pynneh pynsah ia ka jingkhlain jong ka imlang ka sahlang na ka bynta ki pateng ki ban wan.

Shibynta ha ka jingpyrshang kaba dang iaid shakhmat ban weng ia ki jingeh kiba iadei bad ka jingnangkiew ha ka jingdon jong kiba  kyrni ha u drok, ki resource person kiba kynthup ia u Bah F.G.N Ryngnga, District Mission Coordinator, District Hub for Empowerment, Bah D.Nongtdu, OC Jowai Police Station, Bah JK Majaw, Jowai Police bad u Bah C.Langstang, Ambassador, Nasha Mukt Bharat Abhiyan Campaign ki la kdew halor ki sienjam kiba kongsan kiba lah ban aijingiada, ka jingpynsngewthuh bad pynshai paidbah bad ka jingiatreilang hapdeng ki nongshong shnong.

Ia kane ka prokram la pyniaid da ka Kong Y. kyndait, Gender Specialist, District Hub for Empowerment of Women katba ia ka jingkren ai khublei la ioh lyngba ka Kong Y Najiar, DSWO, Jowai.