Da ka prokram ai snam mon sngewbha pynlong ka NSS bad ka RRC Jaintia Eastern College

Syllad | The Rising MeghalayaJuly 4, 2025

Ka National Service Scheme (NSS) bad ka Red Ribbon Club (RRC) Jaintia Eastern College, Khliehriat ha ryngkat ka jingiatreilang ka Jowai Civil Blood Bank Centre ki la pynlong ia ka jingaisnam mon sngewbha (Blood Donation Camp) ha ka prokram ba la pynlong ha ka 30 tarik Jylliew 2025 ha Jaintia Eastern College, Khliehriat.

Shwa ban sdang ka jingaisnam la pynlong ia ka jingialang aijingpynshai (Awareness Programme) halor ka phang “Give Blood, Give Hope, Together We Save Lives”, ha kaba ka Dr. I. Khyriem, Sr. Medical & Health Officer, Blood Centre, Jowai Civil Hospital kala ai ka jingpynshai kaba bniah ha kaba iadei bad ka jingaisnam bad ki jingmyntoi jong ka.

Kala iathuh ruh ba ki briew hapdeng ka rta 18 snem haduh 65 snem, kiba don ka met ka phad kaba koit ba khiah bad ki bym duna ia ka 45 kilo ka jingkhia ki lah ban long ki nongai snam mon sngewbha.

Nalor kata ka la pynpaw ruh ia ki jingmyntoi jong ka jingaisnam namar ba kane ka snam na uwei u nongai ka lah ban ai jingiarap ia ki briew kiba shitom bad kiba donkam snam. Ka la ong ba ka jingaisnam, ka iarap ban pynduna bad tehlakam ia ka jingpang klongsnam, ka jingpang shini bad kiwei kiwei de.

Ha kane ka prokram ki la don khyndai ngut ki samla pule jong ka college kiba la wan shakhmat ban ai snam hynrei tang san ngut napdeng jong ki, kiba long kiba bit ban ai snam ha katei ka sngi.

Ia ka jingialang la pyniad da u Dr. P. Nongtdu, Principal, Jaintia Eastern College, Khliehriat uba la ai ruh ka jingkren lamkhmat bad ka jingkyntu ia ki samla pule da kaba ong ba ka jingaisnam ka ai ka jingkyrmen ia kito kiba donkam ia ka jingiarap. Ula khot ula wer ia kito ki samla kiba koit ba khiah ban wan shakhmat bad ban ai ia ka snam jong ki ka ban long ka jingkyrkhu ia kiwei pat la ka dei ia kiba ki ithuh ne ki bym ithuh kumjuh.

Hadien la ioh ia ka jingkren ai khublei na ka kong Hannah Bell Lapasam, Programme Officer, NSS Jaintia Eastern College Unit ia baroh kiba la ia don lang ha kane ka prokram khamtam eh ia ki khynnah pule jong ka college kiba la pynrung kyrteng bad kiba la kloi ban ai snam ha katei ka sngi.