Da ka namjop ka Iooksi YW & Moodymmai sdang ka Third Div ka WJDSA

Syllad | The Rising MeghalayaJune 10, 2023

Ka lympung ialehkai Third Division- kaba tip kum ka 3rd Adelbert Laloo Memorial Trophy kaba pyniaid da ka WJDSA kala sdang ha madan Kiang Nangbah Stadium da ka nam jop ka Iooksi Youth Welfare bad ka Moodymmai haka sngi Thohdieng.

Ka Iooksi Youth Welfare kala pynliem da 6-1 iaka Saindur Mihmyntdu, ka Moodymmai kala jop da 1-0 iaka Mookynphad Mihmyntdu.

Shuwa kine ki ar tylli ki jingiakhun, ka jingiakhun hapdeng ka Lumsliar pyrshah iaka Risingsun Mukhla kala kut da kaba iakhaid mar 1-1.

Ïaka kol jong ka Lumsliar la thep da u David Dkhar haka minit kaba 8 katba ïaka kol jong ka Risingsun Mukhla la thep da u Yoshar O. Mukhim haka minit kaba 24.

Ki 6 kol ka Iooksi la thep da Pyrkhat Pasleiñ (3, 42), u Pyrshang Tangliang (9, 27), u Ngaitmi Syngkon (70) bad u Sunny Son Sutnga (69). Katba ka shikol jong ka Saiñdur Mihmyntdu la thep da u Chibor Phawa (41).

Katba ka shikol ka Moodymmai pyrshah Mookynphad Mihmyntdu la thep da u Same Syngkon haka minit kaba 61.