Da ka nam jop ka Lion S&YA sdang ka District Cricket League ka WJHDCA

Syllad | The Rising MeghalayaApril 2, 2024

Ka lympung ialehkai ‘District Cricket League 2024’ kaba pyniaid da ka West Jaintia Hills District Cricket Association (WJHDCA) ka la sdang da ka namjop ka Lion S&YA pyrshah iaka North East Adventist University Cricket Club da 8 wicket haka jingialehkai kaba long ha madan Khliehtyrshi Mini Stadium haka 1 tarik Iaiong.

Ka North East Adventist University Cricket Club (NEAUCC) kaba la jop iaka jingkynting pisa (toss) kala kam trai ban bat shuwa bad kala kamai 46 run na ka 14.2 over bad liem baroh ki 10 wicket.

U Vicky marwei ula synniang 16 run na ki 23 bol, katba u Deibormi Rangad ula khyrwit 4 Wicket na ki 3 Over, u Maremdor Sutnga bad u Wijan Pohleng ki la ioh mar 2 Wicket naki 3 Over.

Ka LSYA haba poi ka pali jong ban beh iaka thong kala pyndep tang hapoh 8.4 over da kaba kamai 47 run liem 2 wicket.

U Nick Dann ula synniang 23 run naki 28 bol, u Firstbornson Dkhar ula kamai 15 run naki 18 bol.

Ka khusnam Man of the Match la ioh khur da u Deibormi Rangad jong ka LYSA.

Ha kane ka kynti ki don haduh 10 tylli ki kynhun kiba iashimbynta, haka Pool A ki long ka West Jaintia Police CC, Khliehtyrshi CC, Moodymmai CC, Ummulong Sports Club bad Efty United XI SC (Mynso). Katba haka Pool B ki long ka Phramer CC, Lion Sports & Youth Affairs, Mupliang CC, NEAU Cricket Club bad Cultural Youth Club Mowkaiaw.