Da ka marathon pynlong ka Jingiaseng Samla Balang Presbyterian Mihmyntdu haka jingrakhe Youth Week & Youth Sunday

Syllad | The Rising MeghalayaSeptember 7, 2025

Ka Socio Literary & Sports Association Committee jong ka Jingiaseng Samla Balang Presbyterian Mihmyntdu haka 6 tarik Nailur kala pynlong iaka 16 Marathon, kum shi bynta ka jinglehkmen Youth Week & Youth Sunday halor ka phang “U Jisu ka nongrim jong ka jingim” – 1 Korinth 3:11.

Ha kane ka sngi u District Sports Officer (DSO), West Jaintia Hills Ma Khroobok Passah ula long kum u kongsan haka jingdonlang u waheh shnong ka Mihmyntdu Ma Abul Phawa, Ma Eki Chyrmang ryngkat ki tymmenbasan bad rangbah Balang.

U Ma Khroobok Passah kum u kongsan haka jingkren u pynpaw ka jingsngewnguh ia ka Jingiaseng Samla Balang Presbyterian Mihmyntdu kaba la shim iaka sienjam kum shibynta ban ai lad ia ki nongshong shnong bad ai mynsiem ia kiba don sap haka ialehkai.

Ula ai mynsiem ruh iaka Jingiaseng Samla Balang Presbyterian Mihmyntdu ban iai bteng iaka kum kan ka prokram khnang ba ki khun ka shnong kin shkur mih sha khmat ban ia shim bynta ha kino kino ki jait jingialehkai.

Hadien ka jingialang ka sam trophy ryngkat ki Certificates bad song pisa sha ki nongjop haki artylli ki kyrdan ialehkai kynthup ka kyrdan Senior Boys/Girls bad Junior Boys/Girls.

Ha ka kyrdan Senior Boys la wan nyngkong da u Wandame Kyndait, ba ar Chantremi Shylla bad ba lai Bormi Kyndait. Katba haka Senior Girls ba nyngkong ka Monlangki Kyndait, ba ar Mini Kyndait bad ba lai Beauty Shylla.

Haka Kyrdan Junior Boys u Lurshai Phawa ula wan nyngkong, ba ar Honesty Phawa bad ba lai Bih Chyrmang. Haka Junior Girls la wan nyngkong ka Ishka Kyndait, ba ar ka Haphi Siangshai bad ba lai ka Sambun Kyndait.